Suliffeqarnermut Isumaginninnermullu Ingerlatsivimmit 2024-mi ukiup aamma upernaap ingerlanerani Kommuneqarfik Sermersuumi utoqqaat atugaannik misissuisoqarpoq. Apersuilluni misissuineq kommunimi tamarmit innuttaasunit 433-init 67-inik ukioqalereersimasunit akineqartup takutippaa utoqqaat arlallit suli sulisinnaasut aamma sulerusuttut.
Misissuinermi utoqqaat tallimaagaangata ataatsimit amerlanerusut suli sulipput naak utoqqalinersiallit ukiui angoreeraluarlugit. Sulisut amerlanerit sapaatip akunneranut 20 tiiminit amerlanerusunik sulisarput. Tamatuma saniatigut misissuinermi utoqqaat 22 %-ii annerusumik minnerusumilluunniit sulerusupput kisiannilu aporfeqartutut misigisarlutik. Akileraarutit aamma pension pillugit nalorninerit kiisalu innuttaasunut suliffeqanngitsunut kisiannilu sulinissamik kissaateqartunut suliffissaaleqineq akimmiffinnut annerpaajuvoq. Ilutigalugu utoqqaat ilaat piginnaanikillisimanerminnik unammilligassaqarput suliffeqarnissaminnut akornutaasumik.
Misissuinerup aamma takutippaa sulineq eqqarsartaatsikkut aamma timikkut peqqissutsip akornanni atassuteqartoq. Timikkut eqqarsartaatsikkullu peqqissuseq aamma suliffeqarneq suli attuumassuteqarput. Tassani utoqqaap suna ilinniarsimaneraa apeqqutaanani.
Utoqqaat utoqqalinersiallit ukiui angoreeraluarlugit piumagunik suliinnarsinnaanerat eqaatsumik piumasaqaatinik pilersitsinikkut inuttut aamma inuiaqatigiinnut iluaqutissartaqarpoq. Misissuinermi utoqqaat tamarmik piffissaq tamakkerlugu suliffeqarnissaminnik kissaateqanngillat. Sulerusuttut affai sapaatip akunneranut 10 tiiminit minnerusumik sulerusupput, pingajorarterutaallu sapaatip akunneranut 15 tiiminit minnerusumik sulerusullutik. Taamaattumik kommunimit arlalitsigut suliffiit inissaqarluartitsisut ukkatarineqassapput, taamaalilluni sulisinnaasut aamma sulerusuttut pisariaqartitaminnut naleqquttunik atorfininnissaminnut periarfissaqassallutik. Kommunip nittartagaani utoqqalinersialittut utoqqalinersiaqarnerup saniatigut aningaasarsiornissamut qanoq periarfissaqartigineq annerusumik atuarneqarsinnaavoq.