Nuup timaa immikkuullarissoq pisulluni angalaarfissatut piukkunnartunik periarfissarpassuaqarpoq. Taamaattumik Visit Nuuk pisulluni angalaallammak Valdemar Wilhjelm Geisler suleqatigalugu aasap ingerlanerani Nuup Kapisillillu akornanni pisulluni angalaarfissaq nalunaaqutsersorpaat. Suliaq maanna naammassisimalerpoq.
“Nuummi pisulluni angalaarnissamut takornariarnissaq assut ujartorneqartartoq misigisarparput. Nuup Kapisillillu akornanni aqqut malikkukku Nuup timaa immikkuullarissoq aqqutigissavat, pisullutillu angalaartartorpassuit ujartortagaannik ulikkaarpoq. Tikeraartut ilaat pisulluni angalaartartutut misilittagaqarluartuupput, amerlasuulli angalaarnermi nassuiaasartumik ilagisaqarnissartik orniginartinnerusarpaat. Takornariat taakku assigiinngitsut marluk orniginartissinnaasaannik neqeroorutinik ineriartortitsineq suliaraarput,” Sara Nissen, Visit Nuummi Destination Manager, oqarpoq.
Pisulluni angalaartarfittut aqqutip nutaamik nalunaaqusersorneratigut pisullutik angalaartartut isumannaatsumik pitsaanerpaamillu aqquteqarnissaat ilaatigut qulakkeerneqarpoq. Valdemar Wilhjelm Geisler oqaluttuarpoq:
“Aqqutip nutaap nalunaaqutsersorneratigut aqqummi qooqqut amerlaqisut akornanni kukkulluni ingerlanissaq pinaveersaartinneqassaaq, saniatigullu tammartoqarnissaanut taamalu ulorianartorsiortoqarnissaanik pinaveersaartitsisoqassalluni. Uatsinnut pingaaruteqarluinnarsimavoq aqqutit tikikkuminaappasikkaangata akulikitsumik ersarissumillu nalunaaqutsersuisarnissaq.”
Visit Nuummiit Nuuk pisuttuarluni angalaarfissatut ineriartortinneqarpoq.
Pisulluni angalaarfissatut aqqut Visit Nuummiit annertuumik suliniutaasup ilagaa, tassanilu Nuuk pisuttuarluni angalaarfissatut ineriartortitsinissaq siunertaavoq. Ineriartortitsineq Nuummi Kapisilinnilu takornarialerisunik innuttaasunillu qanimut suleqateqarnermi oqaloqatigiinnikkut ingerlanneqarpoq. Suleqatigiinnerup kingunerisimavaa aqqutit arlallit aalajangersimasut nalunaaqutsersorneqarnerinik. Ilaatigut Kapisilinniit Kangersunerup tungaasut, isertitsivimmiit oqquiffik 1-imut aammalu Kapisilinni Pingu kaajallallugu pisulluni angalaartarfiup aqqutaa. Pinngortitap tatisimaneqarnera annikillisinniarlugu kangerlummi aqqutit amerlisinnissaat pilersaarutaavoq.
“Nuup eqqaani pisulluni angalaarluni takornariaqarneq nuummi ineriartortikkiartuaarneqarnera, najukkamilu takornarialerisut qanimut suleqatiginerat assut nuannaarutigaara. Suli anguniagarput qanillinngilarpulluunniit, takornariartitsinissamulli, najukkami inuiaqatigiinnut pinngortitamullu iluaqutaasussamik, pitsaasumik tunngavissiivugut,” Sara Nissen oqarpoq.
Kapisilinni ikaartarfiliorneq
Pisulluni angalaarluni takornariaqarneq annertunerusumik tapersersorniarlugu Visit Nuummiit Kapisilinni kapisillit illersorniarlugu aamma pisulluni angalaarfissaq tikikkuminarnerussammat ikaartarfiliornissaq sulissutigineqarpoq. Ikaartarfik 2024-mi ukiami imaluunniit 2025-mi upernaami naammassinissaa naatsorsuutigineqarpoq. Tamatuma saniatigut najugaqartunut takornarianullu iluaqutaasussani Nuup timaani masarsuit oqquisarfiillu 12-it aqqutigalugit ikaartarfiliornissaq sulissutigineqarpoq.
Takornarialerinissap tulliani nunap assingi pillugit paasissutissat, gps atorlugu aqqutit aamma aqqutinut nassuiaatit piareersimanissaat Visit Nuummit naatsorsuutigineqarpoq. Paasissutissat aqqutini misigisassarsiorfiusinnaasut sillimaffigineqartariaqartullu nassuiaataannik imaqarput, taakkulu maani najugaqartut tikeraartullu pisulluni angalaarnissaannut nuannersumik misigisaqarnissaannut iluaqutaassapput.
