Kommuneqarfik Sermersuumi Suliffeqarnermut Isumaginninnermullu Ingerlatsivimmi misissuinerup takutippaa, utoqqaat timersukulasut kiserliunnginnerusartut. Misissuineq innuttaasuni 67-ileereersimasuni 433-usut akornanni ingerlanneqarpoq takutinneqarporlu timersortarnerup aammalu eqqarsartaatsikkut nalerisimanerup akornanni ersarissumik attuumassuteqartoq. Utoqqaat timersortartut qaqutigut kiserliortutut misigisarput ilutigalugulu eqqarsartaatsikkut peqqinnerusut nalunaarusiortoqarpoq. Tamanna aamma utoqqarnut pinngortitamiittartunut atuuppoq.
Qujanartumik innuttaasut amerlanerit timimikkut peqqissuusut qaqutigullu kiserliortartut nalunaarusiorneqarpoq.
Utoqqaat piginnaasakillisimasut kiserliukulanerusarput aamma qaqutigut pinngortitamukartarput. Utoqqaat peqqissusaat patajaallisarniarlugu kommunip DigiRehab atuutsilersileruttorpaa, sungiusarnissamut pilersaarut digitaliusoq kalaallisut oqaasertalik, utoqqaat angerlarsimaffimmi sungiusartarnissaannut aalanerunissaannullu ikorfartuisussaq.
Kommune aamma innuttaasunut 67-inik ukioqalereersimasunut sammisassaqartitsinernik arlalinnik akeqanngitsunik neqerooruteqarpoq. Naluttarfik Malik ataasinngornermit tallimanngornermut utoqqalinersialinnut ulluunerani iserneq akeqanngilaq. Paamiuni haali kiisalu fitness aamma timigissartarfik utoqqarnit akeqanngitsumik atorneqarsinnaavoq aamma Tasiilami sunngiffimmi sammisassat tamarmik akeqanngillat.