Ulluni marlunni pikkorissartitsinerup kingorna Kommuneqarfik Sermersooq Paamiuni qimminik akiuussusersuisinnaasunik marlunnik peqalerpoq. Kommunimi atorfillit qimminik qitsunnillu akiuussusersuinerup saniatigut mikrochipiliinissamut akuersissuteqalerput aamma.
Ulluni oktoberip ulluisa sisamaanni tallimaannilu kommunimi atorfillit marluk, Thor Berthelsen (saa) aamma Martin Møller (tal), Namminersorlutik Oqartussani uumasut nakorsaannit Asger von Wenckimit ilinniartinneqarput. Akiuussusersuisinnaalersut nutaat marluk maanna pisortatigoortumik uumasunik akiuussusersuisinnaasutut uppernarsaammik allagartartaaramik nuannaaqaat.
Namminersorlutik Oqartussani uumasut nakorsaat Asger von Wenck pikkorissartitsinermik ingerlatsivoq, peqataasut ilaatigut assigiinngitsorpassuarnik ilikkagaqarput. Pilersaarummi ilaapput:
- Nappaatilerineq
- Nappaatinik siaruaattulerineq
- Akiuussutip sunniunneri
- Nappaatinik pinaveersaartitsineq akiuussusersuinermi periuseq ilanngullugu
- Mikrochipilernermi periuseq
- Uumasut pissusaat
- Uumasut atugarissaarnerat
- Qimminik nakkutilliineq nalilersuinerlu
- Kalaallit qimmeqarnermut inatsisaat
- Qimmiuteqarneq
- Qimminut akiuussusersuisartutut sulineq
- Qimmit nappaataannut tunillaassuuttunut upalungaarsimaneq
- Nuna tamakkerlugu akiuussutissat pillugit paasissutissanik suliaqarneq
Pikkorissartut pilluarujussuaritsi.