Naalagaaffeqatigiiffiup illoqarfiit pingaarnersaat marluk akornanni ataqatigiinneq massakkut nukittorsarneqarpoq.
København aamma Nuuk maanna pisortatigoortumik illoqarfittut ikinngutigiinnermi isumaqatigiissuteqarput ilaatigut qanimut oqartussaaqataaneq, piujuartitsisumik illoqarfimmik ineriartortitsineq, inuusuttut, atugarissaarneq kiisalu pisortat suliffeqarfiini pitsaasumik ingerlatsineq ukkataralugit.
”Illoqarfitta pingaarnersaasut marluusut illoqarfittut ikinngutigiilernikkut qaninnerusumik atassuteqalernerat nuannaarutigaara. København aamma Nuuk imminnut tunngasunik ilikkagassarpassuaqarput suliassaqarfinnilu assigiinngitsorpassuarni ilisimasanik avitseqatigiissinnaallutik, ilaatigut innuttaasunik peqataatitsinerulernermi, piujuartitsisumik illoqarfimmik ineriartortitsinermi aamma kulturikkut avitseqatigiinnissamut sinaakkutissat pitsaanerusut,” overborgmesteri Lars Weiss, København sinnerlugu isumaqatigiissummut atsiortuusoq oqarpoq.
Kommunit marluusuni ataatsimiititat susassaqartut suleqatigiissutigineqartussatut siunnersuutinik suliaqarput. Siunnersuutit assigiinngitsorpassuupput ilisimasanik avitseqatigiinnissamik ineriartoqatigiinnissamillu ukkassiffiusut. Suliniuteqarfiit ukkatarineqartullu ingerlaavartumik nassuiaatigineqassapput.
“Københavnimik illoqarfittut ikinngutigiittut suleqatigiinnissamik isumaqatigiissuteqarneq nuannaarutigeqaarput naatsorsuuteqarluarfigalugulu. Avitseqatigiilluni naleqartitanik pilersitsinikkut aamma innuttaasutsinnik takuneqarsinnaasumik malugineqarsinnaasumillu qaninnerusumik suleqatigiilernerup aallartinneqarnera isumaqatigiissummik nalunaaruserneqarpoq. Kikkut tamat oqartussaaqataanerannik, kiffaanngissusermik, ataatsimoornermik aamma naligiinnermik tunngaveqartumik pissarsiaqarfiusumik suleqatigiinnissaq qilanaaraarput,” Avaaraq Olsen, Kalaallit Nunaanni illoqarfiit pingaarnersaanni kommunimi, Kommuneqarfik Sermersuumi borgmesteri oqarpoq.
Illoqarfittut ikinngutigiittut isumaqatigiissut Københavns Kommunes Borgerrepræsentationimit suliniuteqarnikkut aamma illoqarfiit pingaarnersaasut marluusut qanimut oqaloqatigiinnerat aallaavigalugu aallartinneqarpoq.
Illoqarfiit marluk Naalagaaffeqatigiinnermi illoqarfiit pingaarnersaasa kingulliup Torshavn Kommunep kingusinnerusukkut illoqarfittut suleqatigiinnermut ilanngussinnaanissaa periarfissaqarluarnera isumalluarfigalugu isumaqatigiissummi ilanngulluguttaaq oqariartuutigineqarpoq.
PISSUTSIT
- Isumaqatigiissummi allassimavoq, assigiimmik aamma avitseqatigiilluni naleqartitanik pilersitsinikkut suleqatigiinneq kissaatigineqartoq. Isumaqatigiissummi pingaarnertut sammisani sisamaasuni suleqatigiilluni suliniuteqarfiit aalajangersimasut ilusilerneqarsinnaapput piviusunngortinneqarsinnaallutillu.
- Kulturi, qanimut oqartussaaqataaneq aammalu innuttaasunik peqataatitsineq
- Piujuartitsineq, silaannaap pissusia aammalu illoqarfimmik ineriartortitsineq
- Inuusuttut, atugarissaarneq aammalu peqqinneq
- Pisortat suliffeqarfiini pitsaasumik ingerlatsineq
- Illoqarfittut ikinngutigiittut isumaqatigiissut ukiunik sisamanik sivisussuseqarpoq.
Attaviit
- Overborgmester Lars Weiss pressekonsulent Simon Kærup aqqutigalugu oqarasuaammut 2492 6298
- Kommuneqarfik Sermersuumi borgmesteri Avaaraq Olsen Sulisoqarnermut Attaveqaqatigiinnermullu pisortaq Rosannguaq Rossen aqqutigalugu oqarasuaammut +299 367066
