Massakkut inuusuttut kommunalbestyrelserisaat kingullermeerluni ataatsimiippoq, tassanilu kommunalbestyrelsimut innersuussutigisamik killiffiannik ilisimatinneqarlutillu tullissaanik qinersinissap piareersarneqarnissaanut ikiorneqarput.
Inuusuttut kommunalbestyrelsiani ilaasortat kommunip atuarfiini atuartoqatiminnit qinerneqartarput kommunimilu inuusuttunut ukiut marlukkuutaarlugit sinniisuusarlutik.
Massakkut inuusuttut kommunalbestyrelsia ataatsimiinnerit workshoppeqartitsinerillu arlallit aqqutigalugit innersuussutissatik anguniartarpaat kommunimilu politikerinut saqqummiullugit.
Kommunip ingerlatsiviini suliarineqareerlutik innersuussutit sisamat massakkut kommunalbestyrelsimit suliarineqalersimalerput, ataasinngornermilu septembarip ulluisa 16-ianni inuusuttut kommunalbestyrelsiat kingullermeerluni katersuuppoq, tassani innersuussutigineqartut qanoq ingerlasimanersut tusarlugit.
Borgmesteri Avaaraq Olsen aallartikkami inuusuttut kommunalbestyrelsiat kommunalbestyrelsip ataatsimiittarfiannut tikilluaqquai. Nuummi atuarfiit amerlanerit sinniisuminnik ataatsimiittarfimmi najuutsitaqarput, Tasiilami atuarfik Teams-ikkut peqataatitaqarluni.
Borgmesteri tikilluaqqusinermini pingaartillugu oqaatigivaa: ”Nuannersupilussuuvoq ilissi kissaatigisasi kommunalbestyrelsip kissaatigisaanut qanittunnguunerat paasigatsigu. Tamanna uagutsinnut aamma suliatsinnut aalajangiisarnitsinnullu uppernarsaavoq, peqatigitilluguli aamma inuusuttut kommunalbestyrelseqartinneqarnerata pingaaruteqarnera, tassani eqqortumik ingerlanerput qulakkeerneqarmat. Suliarsi tulluusimaarutigisinnaavarsi, allanngueqataavusi.”
Tamatuma kingorna innersuussutit sisamat killiffii saqqummiunneqarput, taakkunannga marluk akuersissutigineqarput.
Innersuussutigineqartunit siulleq akuerineqartoq tassaavoq Qeqertarsuatsiaani sunngiffimmi klubbimik pilersitsinissaq, taanna nunaqarfinnut immikkoortumut pilersaarutip ilaatut sukumiinerusumik misissorneqassaaq. Innersuussutigineqartoq taanna kommunalbestyrelsimi amerlanerussuteqartunit taperserneqarpoq, Siumut ikinnerussuteqarluni oqaaseqaateqarluni piumasaqartoq tassunga suliassamut aningaasat aalajangersimasut immikkoortinneqassasut.
Innersuussutigineqartup aappaani pineqarpoq atuartut 7.-10. klassini atuartut kingusinnerusukkut atuariartortarnissaat, aamma akuerineqartoq. Kommunimilu atuarfiit massakkut ilusissatut kissaatigineqartup misiligarneqarnissaa nalilersussavaat, atuarfinni siulersuisut, elevrådit allallu attuumassuteqarsinnaasut suleqatigalugit.
Naggasiilluni kommunalbestyrelsimut qujanermini aamma inuusuttut kommunalbestyrelsiata sulinera pitsaasoq sulilluarneralu pillugit qujassuteqarpoq, piumassuseqarlutik atuaqatitik allallu kommunimi tamarmi atuarfinni atuartut sinniisuuffigalugit piffissaminnik atuisimanerat pillugu.
Kingulliit pillugit paasissutisseereernerup kingorna inuusuttut kommunalbestyrelsiata suliai angusaalu pillugit filmimut siunnersuutit pitsanngorsaatissallu suliaralugit aallartinneqarput, kiisalu inuusuttut allat tulliani qineqqusaarnissamut qanoq pilerilersinneqarnissaannut isumassarsiaasinnaasut pillugit quppersagassaliassaq pillugu. Atuartut ataatsimiittarfimmi ataatsimiinnermi peqataasinnaanngitsut atortunik tamanik nassinneqarput, inuusuttut kommunalbestyrelsiata suliaanut kingullermut peqataaniassammata.
