Sapaatip akunnera 35 tamaat Industrivejip aqqutaa sinerlugu unissinnaasoqaranilu biilinik inissiisoqarsinnaassanngilaq. Qamutit assakaasullit tamarmiusut biilinik ingerlaarfinniit peerneqavissapput namminerlu nunaminertanut inissinneqarlutik.
Ukiuni kingullerni Industrivejimi imeqarnissamut, kiassarnermut pilersuinermut innaallagiaqarnissamullu assaasoqarpoq. Nukissiorfiit Kommunilu suleqatigiillutik Industriveji aaqqeqqissavaat asfaltimik nutaamik asfaltilersoqqillugu. Tassa imaappoq, biilinik ingerlaarfiup silissusaa tamakkerlugu nutaamik asfaltilersuisoqassasoq. Suliassami pineqarpoq Sarfaannguini aqquserngup sanguffissap T-nngortup aqqutaa aamma Industrivejimi qummut aqqut 350 meterip missaaniittoq.
Sapaatip akunnera 35-mi entreprenørip asfaltiusoq tamaat piiassavaa, nutaamillu asfaltilersuinissamut iluarsaassillunilu piareersaalluni. Biilinik ingerlaffiit ataasiakkaarlugit matoqqatitsisassaagut aamma illuatungaani angallanneq ingerlatiinnarlugu. Angallannermik akornusersuinerup minnerpaamiisinnissaa pillugu Kommune arfininngornermi 31. aggusti unnukkut nal. 17-iminngaanniit asfaltilersuissaaq. Matumani aqqusineq matoqqassaaq.