Ullumikkut Sermitsiami allaaserineqarpoq, Nuukullak 3E-mi inissianik 73-inik piginnittup kommunimi attartornermut isumaqatigiissut atorunnaarsissimagaa. Tassunga atatillugu Kommuneqarfik Sermersuup erseqqissaatigissavaa, inatsisit paasineqarnissaannik saqitsaassutigineqartut attartortunut inissiami najugalinnut sunniuteqassanngitsut.
“Inissiani attartortut tamaasa eqqissisarusuppakka, suliaq kommunip aammalu inissiamik piginnittup akornanni suliaammat, attartortunut tunngassuteqanngitsoq. Attartortut kikkulluunniit suliap matuma kingunerisaanik inigisaminnit anisitaannginnissaat soorunami kommunip qulakkeerniarpaa,” Ole Jakobsen, Kommuneqarfik Sermersuumi Kommunaldirektøri oqarpoq.
Kommunip attartortitsisullu akornanni suliaq maanna eqqartuussisoqarfimmut suliassanngortinneqaratarsinnaavoq, kommunaldirektørillu erseqqissaassutigaa, qanorluunniit pisoqassagaluarpat inissiami tassani najugaqartut eqqugaannginnissaat Kommuneqarfik Sermersuumit isumagineqassasoq.