Sapaammi ulloq juunip aappaanni aamma ataasinngornermi juunip pingajuanni nunaqarfinni aqutsisuni ilaasortat Kommuneqarfik Sermersuumit tamarmiusuminngaanneersut Nuummi itisiliilluni isumasioqatigiinnermut ornigupput. Anguniagaq tassaavoq nunaqarfiit suliniutit aamma suleqatigiinnernik periutsit nutaat aqqutigalugit nukittorsarlugillu ineriartortinnissaat. Isumasioqatigiinnermi saqqummiussinerit workshoppertitsinerit arlaliusut ingerlanneqarput, matumani peqataasut peqataalluarlutik misilittakkaminnik isumassarsiaminnillu avitseqateqarlutik.
Nunaqarfinni aqutsisut Kommuneqarfik Sermersuumit tamarmiusuminngaanneersut ullut marluk sulinerminni ulapipput. Imaqqortoqisumik pilersaaruteqarpoq, saqqummiussanik workshoppinillu assigiinngeqisunik imaqartumik. Qulequttat pingaarutillit marluk tassaapput, ineriartortitsinissamut periusissiaq aamma inoqarfinnut minnernut pisortat tamanut ataatsimoorussamik sullissiveqarnerannut ilusissaq nutaaq, nunap borgmesteriinit Naalakkersuisuniillu isumassarsianik saqqummiinerannit saqqummiunneqartut. Qulequttat marluk sammineqarneranni oqallisigineqaqaat eqqartorneqaqalutillu.
Borgmesteri Avaaraq Olsen nunaqarfinni aqutsisuni ilaasortat peqataalluarnerannut tunniusimalluarnerannullu nersualaarpai.
“Ilaasortat nukinik eqqarsaaterpassuarnillu tunniussaannut uissuummerpunga. Nunaqarfinnut sinniisuulluartuupput, aamma ineriartortitsinissamut periusissiami nutaami qitiutitatsinni tamat oqartussaanerannik nukittorsaassagaanni pinngitsoorneqarsinnaanngillat. Suliniutaat qularnanngitsumik nunaqarfinni innuttaasunut iluaqutaassapput,” oqarpoq.
Ineriartortitsinissamut periusissiaq nutaaq aamma isumassarsiamik saqqummiineq
Kommuneqarfik Sermersuumi inoqarfinnut minnernut ineriartortitsinissamut periusissiaq nutaaq isumasioqatigiinnermi saqqummiunneqarpoq. Periusissiap, allaffeqarfiup, nunaqarfinni aqutsisut innuttaasullu akornanni oqaloqatigiinnikkut suliarineqartup, inissaqassutsikkut atugassaritinneqartut pitsanngorsarnissaat, inuttut piginnaasanik periarfissanillu nukittorsaanissaq aamma inoqarfinni eqqaanilu suleqatigiinnermik siuarsaanissaq qitiutippai. Pisortanit sullissinerit pitsaanerusumik ataqatigiissaarnissaannut aamma tamat oqartussaanerannik nukittorsaanissamut, taakku innuttaasunut tamanut inuunermi atugaannut pitsaanerulersitsisussaasut qulakkeernissaat siunertaavoq. Periusissiaq aasap ingerlanerani tamanut tusarniaassutigineqassaaq, ukiamilu akuerineqarnissaa naatsorsuutigineqarpoq aamma ukiup tulliuttup ingerlanerani atuuttussanngussalluni.
Taassuma saniatigut inoqarfinnut minnernut pisortat tamanut ataatsimoorussamik sullissiveqarnerannut ilusissaq nutaaq pillugu isumassarsiaq saqqummiunneqarpoq. Ilusissap, Isumaginninnermut, Suliffeqarnermut Nunamilu Namminermi pissutsinut Naalakkersuisoqarfimmi pisortamit Martha Abelsenimit saqqummiunneqartoq, namminersorlutik oqartussat suliffeqarfiutaasa kommunillu akornanni suleqatigiinnerit annertusineritigut pisortat sullissinerat pitsaanerulersissavai.
“Ilusissap nutaap pisortanit kiffartuussinerit ataqatigiissaarnerulernissaat, inoqarfinnilu mikinerusuni pisariaqartitanut naleqqussarneqarnissaa qulakkiissavai. Nukiit ataatsimoortinnerisigut qanimullu suleqatigiinnikkut innuttaasunut pitsaanerusumik sullissisinnaavugut,” Martha Abelseni nassuiaavoq.