Kommunalbestyrelsip Najukkami Tapiissuteqartarfik nutaaq pilersippaa, taanna nutaaliortut, piujuartitsineq, nammineq kajumissutsimik ingerlatsineq, sunngiffimmi sammisaqartitsineq aamma kommunimi ataatsimoortitsinermik siunertanut atorneqassaaq.
Maanna Najukkami Tapiissuteqartarfik qinnuteqarfigineqarsinnaalluni ammarpoq, taassuma siunertaraa najukkami inuiaqatigiinni suliniutinik pisuunnguallaataasut nukittorsaataasullu tapiiffigisassallugit, suliniutit nutaaliornermik imallit, piujuartitsinermik siuarsaataasut, ataatsimoortitsinermik nukittorsaataasut, nammineq kajumissutsimik tunngaveqartut imaluunniit sunngiffimmi sammisassanik amerlanerusunik tapersersuisut.
Suut qinnutigineqarsinnaappat?
Tapiissuteqartarfik suliniutinut sunulluunniit ammavoq, suliniutit:
- Najukkami allannguutissanut isumassarsianik nutaanik imaluunniit periutsinik saqqummiussisut.
- Piffissamut ungasinnerusumut avatangiisinut, kulturikkut, aningaasatigut imaluunniit inooqatigiinnermi imminut napatissinnaanermut anguniagaqartut.
- Inunnik ataatsimoortitsisut aamma peqataasutut misigissutsimik siuarsaasut.
- Nammineq kajumissutsimik suliniutinut soqutiginninnermullu tapertaasut.
- Sunngiffimmi sammisanik siuarsaataasut, taakkununnga ilanngullugit pinngortitami sammisaqartitsinerit aamma sammisaqartitsinerit pinaveersaartitsinermik sunniutillit.
Kikkulluunniit qinnuteqarsinnaapput
Kommuneqarfik Sermersuumi innuttaasut aamma kommunip suliffeqarfiutai tamarmik qinnuteqarsinnaapput soorlu atuarfiit, meeqqeriviit aamma kulturimik ingerlatsisut tapiissuteqartarfimmit aningaasaliiffigineqarnissaminnut qinnuteqarsinnaapput. 2024-p naanissaata tungaanut qinnuteqartoqarsinnaavoq, aamma aningaasat tunniunneqassapput missingersuutit 2,5 mio.kr.-iusut nungunissaasa tungaannut. Qinnuteqaat 100.000 kr.-nit ataallugit aningaasartallit sapaatip-akunnerisa pingasut iluanni suliarineqartarput, amerlanernillu aningaasartallit sapaatip-akunnerisa arfinillit iluanni.
Qinnuteqarsinnaajumalluni qinnuteqarnermi immersugassaq immersorneqassaaq aamma suliniummut allaaserisaq ilanngunneqassaaq, missingersuutit erseqqissut aamma peqataasut allattorsimaffiat kiisalu sullinniakkat kikkuunerat. Suliniutinut meeqqanut inuusuttunullu siunertalinnut tunngatillugu meeqqanik pinerliisimannginnermut allagartat ilanngunneqassapput.
Qanoq ilillutit qinnuteqarnissat pillugu kommunip nittartagaani annermik paasisaqarsinnaavutit. Neriuppugut Kommuneqarfik Sermersooq tamakkerlugu amerlasoorpassuit pitsaasumik siunertalinnut qinnuteqaasiussasut.