Kommuneqarfik Sermersooq kulturi pillugu politikkimik nutaamik suliaqaleruttorpoq, innuttaasullu tamaasa takorluukkaminnik isummaminnillu apuussinissaannut tikilluaqqullugit. Kulturikkut misigisassat neqeroorutillu ilinnut qanoq isumaqarpat? Isummersuutitit siunissami kommunitsinni kulturikkut misigineqarsinnaasussanut ilusilersueqataassapput.
Kulturi pillugu politikkissap siunertaraa eqqumiitsuliornermi kulturimillu suliaqarnermi qanoq ineriartortoqarnissaanik takorluukkamik pilersitsinissaq kiisalu takorluukkap qanoq anguneqarnissaannik sinaakkutinik pilersitsinissaq.
Illit innuttaasutut pingaartitatit paaserusullugit kaammattorpatsigit kulturikkut neqeroorutit suut atortarneritit kiisalu kulturikkut misigisassat ilinnut qanoq pingaaruteqartiginersut. Kommunitsinni kulturilerinermi ineriartornissaq pillugu takorluugaqarpit imaluunniit isumassarsiaqarpit? Taakku tusarusuppagut!
Apersuilluni misissuinermi immersugassaq nittartakkami Kommuneqarfiga-mi immersoruk.
Ulloq aggustip 24-anni 2024-mi aasaanerani festivalip “Aasarpalaaq” ingerlanneqarnerani isumassarsiortoqarnerani aamma peqataasinnaavutit. Aasaanerani festivalimi peqataasut kulturikkut neqeroorutinut isummanik aalajangersimasunik apuussuisinnaapput. Taanna Aqqaluup Aneerasaartarfiani pissaaq. Aaqqissuussaq qanilleriarpat paasissutissat sukumiinerusut saqqummiunneqarumaarput.
Isummersuutitit Kommuneqarfik Sermersuup kulturi pillugu politikkiliorneranut suleriaqqinnermi ilaatinneqarumaarput. Taamaattumik eqqarsaatinnik isumassarsianillu avitseqatigisigut tamatsinnullu kulturimik assigiinngiiaartumik pisuunngortitsisumillu pilersitseqataallutit.
Tunniussassatit Kommuneqarfik Sermersuumiit qilanaaraagut!