Kommuneqarfik Sermersuumi borgmesteri Avaaraq Olsen, illoqarfiit pingaarnersaat pillugu periusissiaq pillugu sulineq tallimanngornermi Nuup Mittarfiata illorsuani nutaami “Nuuk 2035 – Ataatsimoorluta siunissarput”, Ataqqinartorsuarnut Kunngi Frederimmut aamma Dronning Marymut saqqummiuppaa.
Periusissiami nutaami, suli suliarineqartumi, Kalaallit Nunaanni illoqarfiit pingaarnersaanni piujuartitsisumik peqataatitsisumillu ineriartortoqarnissaa qulakkeerneqassaaq.
Nuuk ukiorpassuarni sukkasuumik ineriartorfiuvoq allanngoriartorfiullunilu. Periusissiami unammilligassat periarfissallu kommunimit suliarineqarnissaat piareersarneqassaaq.
“Nuuk sukkasuumik ineriartorpoq, illoqarfiup ineriartornera innuttaasunut tamanut iluaqutaanissaa qulakkiissallugu kissaatigaarput.
Tassunga atatillugu erseqqissaatigaa, mittarfiup nutaap, Atlantikoq ikaarlugu umiarsualiviup Kangerluarsunnguanilu erngup nukinganik innaallagissiorfiup allinerinut peqatigitillugu, Nuummi periarfissanik nutaanik ammaassissasoq.
“Kapitali nutaaq pissanganartoq appakaaffigilerparput, illoqarfiit pingaarnersaannut Kalaallit Nunaatalu sinneranut periarfissanik nutaanik ammassiffiusoq,” nangilluni oqarpoq.
Periusissiami qitiusut ilagaat innuttaasunik soqutigisaqartunillu peqataatitsineq 24-riarluni workshoppertitsinikkut ataatsimiititsinikkullu, taakkunani innuttaasut 230 sinnerlugit peqataasoralugit.
Innuttaasut 700-t sinneqartut aamma innuttaasut atugarissaarnerannik misissuisitsinerni peqataapput. Taamatut atituumik peqataatitsinikkut kikkut tamarmik tusarneqarnissaat qulakkeerneqassaaq. Peqataatitsinermi ukkatarineqartut arlaqarput, taakkununnga ilaalluni inuttut ineriartorneq aammalu tunngaviusumik atugarissaarneq, inissiat naammattut, inuussutissarsiorneq takornariaqarnerlu, attaveqaasersuutit aammalu pinngortitaq, kulturi sunngiffillu.
“Pitsaasunik aaqqiissutissarsiussaagut aammalu attassinnaasunik siunissamullu isigisumik aalajangiisarluta,” borgmesteri oqarpoq. Borgmesterip erseqqissaatigaa, siunniunneqartoq tassaasoq illoqarfiit pingaarnersaat, innuttaasunit tamanit najugariuminartoq, aammalu Kalaallit Nutaata sinnerani pitsaasumik ineriartortoqarnissaanut immersueqataasussaq.
Borgmesterip piffissami kingullermi periusissiaq piffissamik annertuumik atuiffigaa, kisianni siullermeerluni aatsaat kunngikkormiunut saqqummiuppaa.
“Uanga pingaartitarujussuannik kunngikkut saqqummiussiffigineri pingaartorsiornarlunilu nuannersuuvoq.Aammalu isumaqarpunga pingaaruteqartoq, illoqarfik maannakkutut isikkoqartillugu saqqummiutiinnarnagu, ukiuni aggersuni ilimagisamik ineriartornissaanik oqaluttuussinnaaneri paasissutissiiffigisinnaanerilu pingaaruteqartoq,” Avaaraq Olsen oqarpoq.
Piffissami aggersumi paasisat katersorneqartut Nuup ineriartornissaanut sammisumik pilersaarusiornermut politikkikullu pingaarnersiunermut atorneqassapput, periusissiarlu ukiaru naammassineqarnissaa naatsorsuutigineqarpoq.