Politiip Aputsiaq Hansenip utoqqaat utoqqaat illuaneersut aneeqatigisimallugit Facebookikkut ilanngussaa takuiuk? Aputsiaq Hansenitut iliorsinnaavutit, utoqqarnut pulaarlutit imaluunniit pisuttuaqatigalugit.
Aputsiaq Hansenip takutippaa tamatta qanoq iliorluta inuiaqatigiinnut allannguisinnaanersugut. Utoqqaat illuanut alakkaatilaarneq qungujunnermik nuannersunillu misigisaqarnermik kinguneqarpoq.
”Utoqqaat illuanukarlunga aperiartorpunga najugallit ilaat silagissuup ataani pisuttuartunga ilagerusunneraannga. Tamanna tigulluarneqarpoq, umiartortuusimasoq imaq alakkarterusukkaa aneeqatigaara. Aneeqatima aappaa ”Nuummiuissuartut” taaneqarsinnaasoq illoqarfiup qeqqanut aneeqatigigakku ilisarisimasarpassuani ilassiorpai,” Aputsiaq Hansen Facebookimi allappoq.
Aputsiaq Hansenip takutippaa annertunngikkaluamik ikinngutinnersumilli iliuseqarnerit utoqqartatsinnut qanoq nuannaartitsisinnaatigineri. Utoqqarnut pulaartartutut imaluunniit aneerussisartutut ilanngunniarnerlutit eqqarsaatersuutigilaarniariuk – piffissaqarnerit najuunnerillu utoqqaat ulluinnaanni allannguisinnaapput.
Nammineq kajumissutsit atorlugu utoqqarnut ikinngutaalerusuppit? Taava utoqqaat illui imaluunniit utoqqaat angerlarsimaffiini ikiortinut attaveqarit:
Angerlarsimaffimmi Ikiortit Nuuk
tlf.: (+299) 366167
Ippiarsuk Nuuk
Tlf: (+299) 366194
Mobil: (+299) 564520
Utoqqaat Illuat
Tlf: (+299) 366131