Kommuneqarfik Sermersuumi Susassaqartitsinermut Kultureqarnermullu Immikkoortortaq kulturilerisut attaveqatigiiffiannik nutaamik pilersitsivoq, eqqumiitsuliortunik, kulturikkut suliffeqarfinnik aaqqissugaanernillu ilisimasanik, misilittakkanik avitseqatigiiffissatut kulturimullu tunngasut apeqqutit kivinneqarnissaanik siunertalimmik. Eqqumiitsuliortunit kulturilerisunillu suliniut sivisuumik kissaataavoq.
Ataatsimiinneq siulleq 6. juuni 2024 ingerlanneqarpoq, eqqumiitsuliortunit kulturilerisunillu suliaqartunit assigiinngitsunit peqataasoqarluni. Nuannersumik ingerlanneqarpoq aamma misilittakkanik suliniutinillu avitseqatigiittoqarpoq, sammisanillu assigiinngitsunik oqallittoqarluni soorlu eqqumiitsuliortut pisinnaatitaaffii, eqqumiitsuliortut atugarisaat aamma ataatsimoorussamik kulturikkut ullorsiutiliornissamut periarfissaq.
”Uatsinnut Kommuneqarfik Sermersuumi kultureqarnermut immikkoortortami pingaaruteqarpoq sulinitsinni innuttaasut soqutigisaqartullu peqataatinnissai. Tamanna attaveqaqatigiiffimmik pilersitsinitsinnut tunngaviuvoq. Sulinerput siammasissorujussuuvoq eqqumiitsuliornermi kulturilerinermilu assigiinngitsunik imaqarluni, taamaattumik pingaaruteqarpoq sapinngisamik amerlanerpaat peqataatinnissaat,” Jonas L Nilsson, susassaqartitsinermut kultureqarnermullu immikkoortortami aqutsisoq oqarpoq.
Kulturilerisut attaveqatigiiffiat pilersinneqarpoq:
- Eqqumiitsuliortut kulturilerisullu katersuutsinniarlugit
- Ilisimasanik misilittakkanillu avitseqatigiinnissamut
- Suliassaqarfimmut iluaqutaasussamik kulturimut tunngasut apeqqutit kivissallugit
- Tusarniaanermut akissutinik oqallinneq, suliniutillu allat suliassaqarfimmik katersuutsitsisut
Attaveqaqatigiiffik peqataasunit, eqqumiitsuliornermik kulturilerinermillu sulialinnit ingerlaavartumik ilusilersorneqassaaq, ukiumut sisamariarluni ataatsimiittarnissaq pilersaarutaavoq. Ataatsimiinnissap tullia pilersaarutigineqarpoq 4. september 2024 nal. 14.30.
”Ilisimavarput aallartinnermiit kikkut tamaasa qaaqqusinnaannginneri kisianni attaveqatigiiffimmut peqataanissamut soqutiginnittut uatsinnut allassinnaapput,” Jonas L Nilsson oqarpoq.
Apeqqutissaqarpit imaluunniit kulturilerisut attaveqatigiiffiannut ilanngunnissat kissaatigaajuk, taava uunga allagit: kultur@sermersooq.gl
Suliniutip nanginnissaa qilanaaraarput aamma ataatsimiinnerup tulliani peqataasut amerlanerit takunissai qilanaaraarput!