Inuit attaveqatigiittarfiisigut ulluni kingullerni tusatsiakkat ingerlaarput, Nuukullak 3-mi attartortut 73-it inissiaminniit anisitaaratarsinnaasut. Tusatsiakkat ilumuunngillat.
“Attartortut tamaasa eqqissisarusuppakka, suliaq kommunip inissianillu attartortitsisup akornanni isumannaagassaammat, attartortullu tassunga akuunngillat. Attartortoq kinaluunniit suliap kingunerisaanik anisitaannginnissaa kommunip soorunami qulakkeerusuppaa,” Ole Jakobsen, Kommuneqarfik Sermersuumi Kommunaldirektøri oqarpoq.
Suliamut tunngavik tassaavoq, inissianik attartortitsisarnermut inatsit qanoq paasineqassanersoq paatsuungassutaanera, taamaattumillu nalornissutigineqalersimalluni attartortitsisoq qanoq annertutigisumik kommunimut akiliisitsisinnaassanersoq.
“Ajornartorsiutaasup aaqqinneqarnissaanut kiisalu inuussutissarsiuteqartunut attartortitsinermi isumaqatigiissummi eqqortumik annertussusiliinissaq pillugit attartortitsisoq aammalu Namminersorlutik Oqartussat qanimut suleqatigilluinnarpagut. Qularnanngitsorli tassaavoq – Kommuneqarfik Sermersooq imaluunniit Iserit A/S inuussutissarsiuteqartunut attartortitsinermut tunngasoq unioqqutissimanngimmassuk, taamaattumillu attartortut anisitaanissaat pinavianngimmat,” Ole Jakobsen oqarpoq.