Ataqqinartorsuaq Kunngi aamma Ataqqinartorsuaq Dronningi kunngikkormiutut Nunatsinnut siullermeerlutik tikeraassapput, sisamanngornermi juulip sisamaanni nal. 10.00 Nuummi Nuup Saavanut tikinnissaannut tikilluaqqusinissamut kikkut tamarmik aggersarneqarput.
Borgmesteri Avaaraq Olsen kommunaldirektøri Ole Jakobsen peqatigalugu Kunngikkut tikilluaqqussavai. Tikilluaqqusineq pereerpat innuttaasunik takkuttunik ilassinnilaarnissamut piffissaqartinneqassapput.
Kommuneqarfik Sermersooq tikeraartoqarnermi pilersaarusiornikuuvoq
Sisamanngorneq, 4. juuli
10:00 Nuup Saavanut tikinneq. Tikilluaqqusinermi innuttaasut kikkut tamarmik peqataanissamut tikilluaqqusaapput.
10:30 Kommuneqarfiup Allaffiani pisortatigoortumik tikilluaqqusineq.
11:45 Atuarfik Inussuk takornariarlugu
14:50 Mittarfiup illutaanut nutaamut takornariarneq
15:45 Sannavimmut pulaarneq, issittumi ilisimasassarsiorsimasumik Arnarulunnguamik eqqaassutissaliorneq takusaqarfigalugu
Tallimanngorneq, ulloq 5. juuli
10.00 Kunngip Nuussuup Atuarfia pulaassavaa, aamma Fonden for Entreprenørskab aqqutigalugu suliniutinut unamminermilu peqataasimasunik atuartunik naapitaqassalluni.
10.00 Dronningi meeqqerivimmut nutaamut Naasumut pulaassaaq, tassani pimmatiginnittarneq akiorniarlugu Mary Fondenip anguniagaanut najoqqutassiaq malillugu suliniartoqarpoq.
Kunngikkut Kalaallit Nunaannut tikeraarneranni pilersaarut tamakkiisoq pillugu paasisaqarnerugit:
Oqaluttuarisaanermi aatsaat pisussamut malunnartitsinissatsinnut takkullutit pingaartorsioqatigisigut! Nuup Saavani takunissassinnut qilanaarpugut.