Nuummi Najukkami Ataatsimiititaliap aamma Sanarfinermut Avatangiisinullu Ingerlatsiviup, Qaavata putorsuullu eqqaani tummerarsuit kusassarneqarnissaat kissaatigaat. Tummeqqat taakku nutarterneqaannaratik kisiannili aamma Nuummi eqqumiitsuliornikkut qitiunissaat sumiiffittullu katersuuffiusinnaanissaat isumassarsiorfiusinnaanissaallu takorloorsinnaavarput.
QANOQ ILLIT PEQATAASINNAAVIT:
- Siunnersuuteqarnissamut piffissami killissarititaasoq: 9. aggusti 2024nal. 12:00. Siunnersuutit uunga nassiuguk nuuklokaludvalg@sermersooq.gl
- Peqataassaguit: Nuummi najugaqassaatit, missingersuut 275.000 koruunit iluanniissaaq, aamma paasisaqarnerorusukkuit aamma suliniummut atortussanik tunineqarnissaq pillugu ugguuna attavigisigut: nuuklokaludvalg@sermersooq.gl
- Illit eqqumiiitsuliat: Tummeqqanik kusassaassaaq, aserorteriffigineqarumi naalluni aamma aserfallatsaaliorneqarnissaa pisariussanngilaq
ISUMASSARSIORFIGAATSIGIT:
Nuummi najukkami eqqumiitsuliortut soqutiginnittullu tamarmik nutaaliortumik siunnersuuteqaqqullugit kaammattorpagut, missingersuutip aalajangerneqarsimasup iluani akeqartussamik. Kusassaanermi eqqumiitsulioriaatsit suulluunniit atorneqarsinnaapput, aamma ass. qulleqarsinnaavoq, qalipaatit atorneqarsinnaapput, aamma street art, qiperukkat allalluunniit atorneqarsinnaallutik. Siunnersuutit qanorluunniit ittut tikilluaqqusaapput.
EQQUMIITSULIAMIK TOQQAANEQ:
Inaarutaasumik eqqumiitsuliaq Sanarfinermut Avatangiisinullu Ingerlatsivik qanimut suleqatigalugu toqqarneqassaaq, toqqakkap tummeqqat isikkuat nutaaq ataatsimut atassusersinnaassammagu aamma uagut aserfallatsaaliornermut atorsinnaaneratalu sivisussusissaanut piumasaqaatigut piviusunngortissinnaaniassammagit. Suliniut una nutarsaaneruinnaanngilaq; illoqarfittali ilaanik inuuneqarnermik, kusanassuseqarnermik, ataatsimoorfiulersinnaasumillu ilassuteqarnissamik periarfissiivoq. Ataatsimoorluta asseqanngitsumik pilersitsisa, Nuummi siunissami ukiorpassuarni kusassaataasussamik.