Piujuartitsineq, mingutsitsinngitsunik pisineq mingutsitsinnginnerulernissarlu Kommuneqarfik Sermersuup assut pingaartitarivai, taakkununngalu tunngatillugu pisiortortarfiit kommunimit arlaleriarlugit ataatsimeeqatigiinnissanut aggersarneqartarput, piujuartitsineq aamma mingutsitsinnginnerulernissaq qitiutillugu pisiniartarnissaq pingaartinneqarmat.
Kommunip pisiortortarfiinik ataatsimiinnermi pisiniarnermut aamma suleqatigiinnermut isumaqatigiissuterpassuit pitsaasut siullertut pingaartillugu qitiutinneqarput. Kommunip mingutsitsinnginnerusumik piujuartitsinermillu tunngaveqartumik politikkeqarnissaminik kissaateqarnera ilutigalugu isumaqatigiissutit tunngaveqartinneqassapput. Tassunga tunngatillugu kommunimi Neqerooruteqartitsinermut Isumaqatigiissutinullu Immikkoortortami pisortap Carsten Jensenip kommunip piujuartitsineq tunngavigalugu pisiniartarnermut neqeroortitsisarnermullu politikkia nutaaq saqqummiuppaa. Politikkimi tassani kommunip pisiniartarnerani pingaartitat arfineq-pingasut sakkortuumik pingaartinneqarnissaat malinneqarnissaallu pineqarpoq, siunissamilu pisiniartarnermi mingutsitsinnginnerusunik alaatsinaannerulluni pisarnissaq qulakkeerneqarpoq.
Neqeroortitsinerni oqaatsit pingaartinneqartut piumasaqaatigineqartullu tassaapput avatangiisinut mianerinninnermut nalunaaqutsiussat, nukissiutinik atorluaaneq atoqqiinerlu, taakkualu oqaloqatigiinnermik suleqatigiinnermillu pisariaqarfiupput. Suleqatigiinneq aaqqiissutinik nutaanik pitsaanerusunillu kinguneqarsinnaasoq. Pisiortorfinnik ataatsimeeqateqarnerup ilaatut Klaus Poulsenip, Arctic Print-imeersoq, kommunip neqerooruteqartitsinerani kommunimik isumaqatigiissutertik kingulleq suliatut takutippaa, tassani aningaasaqarnerup piujuartitsinerullu ingiaqatigiissinneqarsinnaanerat qanoq pisinnaasoq takutillugu. Taamaattumik piujuartitsinerup aamma mingutsitsinnginnerulernerup iluani ilisimasanik avitseqatigiittoqarlunilu misilittakkanik paarlaassisoqarpoq.
Kommunip pisiniartarnermi neqerooruteqartitsisarnermilu politikkia nutaaq uani atuarsinnaavat:
Pisiniartarnermut neqerooruteqartitsinermullu politikki – Kommuneqarfik Sermersooq