Kommuneqarfik Sermersooq Paamiuni Nuummilu sulisunut imminut toqunnissamik pinaveersaartitsineq pillugu pikkorissartitsinermik ingerlataqaqqammerpoq.
Pikkorissarneq ulluni pingasuni ingerlanneqartoq kommunimi sulisunut ulluinnarni illoqarfimmi innuttaasunut attaveqartartunut siunnerfeqarpoq. Pikkorissarneq politikkikkut aalajangiineq aamma sulisunit ujartuineq “oqaloqatiginninnerit ajornakusoortut” ingerlanneqartarnerinut piginnaasanik sakkussanillu eqqortunik pissarsinissamut sivisuumik kissaatigisaq malillugu ingerlanneqarpoq. Peqataasut ilaatigut imminut toqunnissamik eqqarsaateqarnermut pissusilersoriaatsinut tunngasunik aarlerinaatsinik nalilersuinermut, imminut toqunnissamik pinaveersaartitsiniarnermik oqaloqatiginninnermik aamma qanigisaasunik innuttaasunillu imminut toqoriarsimasunik attaveqaqatigeriaatsinut tunngasunik ilisimasaqalerput.
Paamiuni pikkorissarneq iluatsilluartumik ingerlasimavoq, assingusumillu siunertalimmik imalimmillu Nuummi ingerlanneqarpoq, pikkorissarneq juunip ulluisa 12-ianiit 14-ianut ingerlanneqarpoq, 20-it peqataallutik. Innuttaasunik imminut toqunnissamik aarlerinaatilinnik paasinninnissaannut ikiuisinnaanissaannullu sulisut pitsaanerusunik sakkussanik tunineqarnissaat pikkorissarnermi siunertaavoq. Kommunimi ingerlatsivinni assigiinngitsuni innuttaasut assigiiaartumik aamma pitsaasumik ikiorneqarnissat tamatuma qulakkiissavaa.
Sulisut ikorfartuinermi siunnersuinikkullu inuttaasunut imaannanngitsorsiortunik ikorfartuinissaminnut massakkut nutaanik sakkussaqalersimassasut naatsorsuutigineqarpoq. Aalajaannerusumik ikorfartorteqarnermik pilersitsinissamut alloriarneq pingaaruteqarpoq, sulisut amerlanerusut innuttaasunik pisariaqartitsisunik ikiuisinnaalerlutik, sullissinermi imaluunniit atuuffinni innuttaasunut tunngasunik suliaqarneq apeqqutaatinnagit. Pikkorissarneq aamma ukiup ingerlanerani kingusinnerusukkut kommunimi illoqarfiit sinnerini ingerlanneqassaaq.
Imminut toqunnissamik eqqarsaateqartarlutit misigiguit, ajornartorsiutit nammineq aaqqissinnaasorinngisatit pillugit oqaloqateqarnissannut pisariaqartitsiguit Tusaannga attavigiuaannarsinnaavat. Kinaassutsit isertuullugu aamma akeqanngitsumik sianersinnaavutit. Tusaannga ulloq unnuarlu sapaatip akunnerani ullut tamaasa ammasarpoq, qaqugukkulluunniit attavigineqarsinnaavoq uani:
Oqarasuaat: 80 11 80
