Maanna imaatigut angalaneq aallarteruttorpoq, aallarteruttorneranilu Sermersuumi Qatserisartut ikuallattoqarnissaa pinaveersimatinniarlugu nalinginnaasumillu imaatigut isumannaatsuunissaq pillugu siunnersuuteqarput.
Umiatsiaqarpit?
- Umiatsianni naleqquttumik qatseruteqarpit? Ikuallattoortoqarnissaanut piareersimaniarluni umiatsiami qatserummik peqarnissaq pingaaruteqarpoq.
- Umiatsiami unnuissaguit eqqaamajuk ikuallattoornermi kalerrisaarummik akuerisaasumik nassarnissat.
- Umiatsiaq uuliamik ikummatilimmik kiassaateqarpat eqqaamallugu CO2-mik kalerrisaaruteqartinnissaa.
Eqqaamajuaannaruk: Innaallagissap aqqutai, kiassaat uuliamik ikummatilik imaluunniit kissarsuutit gas-itortut kiisalu ajutooriataassagaluaruit isumannaallisaanermi atortut annanniarnissannut atugassatit ilisimasalimmit misissortissallugit.
- Angalaqataasut tamarmik annanniuteqartittuarnissaat eqqaamajuk.
- Annanniut imaani puttasartoq nassarsinnaavattaaq.
- Ajutuussagaluaruit qanoq kalerrisaarisinnaallutit ilisimaarissavat.
- Garmin Inreach assigisaaluunniit umiatsiami pigineqartariaqarpoq.
Illuaraqarpit?
- Illuaraatinni qapuusalimmik qatseruteqarpit?
Ikuallattoqassagaluarpat illuaqqami qapuusalimmik qatseruteqarnissaq assigisaanilluunniit peqarnissaq pingaaruteqarpoq. Piffissaalluartillugu ikiortissatit takkunnissaat naatsorsuutigisinnaanngilat. Taamaattumik ikuallattoqassagaluarpat sillimasussaavutit.
- Kissarsuutaasaq uuliatortoq, kissarsuutaasaq gas-itortoq imaluunniit angallatit kissarsuutaat pigigaluarukkilluunniit kiassaateqarfitit eqqummaariffigilluartussaavatit. Kiassarnissamut ikkussugassat eqqortumik ikkussorneqarsimasussaapput, aamma kiassaateqarfiit eqqaanni ikuallariaannarnik peqassanngilaq.
- Illuaqqami ikuallattoornermi kalerrisaarummik ajornanngippallu CO2-mik kalerrisaarummik ikkusimasoqarnissaa eqqaamajuaannaruk. Unnuinnginnermi tamatigut kalerrisaarut ajunnginnersoq misissortarnissaa eqqaamajuk.
- Illuaraq innaallagialersugaappat, ilisimannittumit ikkussorneqarsimassapput. Aamma seqernup qinngorneranik tigooraasut ilanngullugit.
- Gas-itortumik kissarsuuteqaruit ilisimannittumit misissorsimaneqarnissaa qulakkeertussaavat.
Nunami ikumaartitsiniarpit?
- Nunami ikumaartitsiniaruit innerup siammarsinnaajunnaarnissaa qulakkeertussaavat.
- Eqqanni imermik peqartuaannarnissaa eqqaamajuk, taamaalillutit ikumatitsivik qimalernerani qamissinnaaniassavat, imaluunniit ikuallattoqarpat qamissinnaaniassavat.
- Ikuallattoqassagaluarpat upalungaarsimasunut kalerriinissamut periarfissaqarpat nangaanak kalerriissaatit.
Kommuneqarfik Sermersuumit tamassi isumannaatsumik aasarsiorluarnissassinnik kissaappatsigit.
