Ulloq 4. juuni 2024-mi USK-imiit aamma ASK-imiit atuartut isumalioqatigiissortaat Atuarfik Inussummi nutaami takornarniartinneqartut siulliit ilagalugit takuniaatinneqarput. Atuarfimmi aqutsisut takornarniartitsisuupput, ilaatigullu atuarfimmi atortorissaarutit nutaat atuartunut alakkartertinneqarlutillu atuartut apeqquterpassui akiortorpaat.
Aallaqqaammut atuartut nipaallutillu takusassarsiorput, takusatik tupigerpasillugit atuarfillu kusanartoq pitsaasumik isigalugu.
Takornarniartitsineq inersuarmiit klassiniillu aallartinneqarpoq, atuartitsinissarlu qanoq ingerlanneqarnersoq pillugu aqutsisunit nassuiaatigineqarluni. Atuartut takornarniartinneqarnertik tamaat assut alapernaapput atuarfiullu aaqqissugaaneraniit pissutsinut pisarialinnut tunngasunik apeqquterpassuaqarlutik.
”Atuartut isumalioqatigiissortaat qanoq oqariartuuteqassanersut tusassallugit uagutsinnut pingaaruteqarsimaqaaq. Atuartuutigineqalersussat ilinniartitsisunngortussallu atuarfiup naammassineqangajaqqaneranik takunnittooqqaarput” Uffe Lilholm oqarpoq.
Atuartut oqallinnissaat qanorlu apersornissaat siunertaralugu gruppikkaartillugit agguataarneqarput. Aserorterisarneq pillugu ernumagisaqarneq atuarfiullu angissusaa inissaqassusaalu pillugit apeqqutit ilaatigut sammineqarput. Atuarfiup atortorissaarutai apeqqutigineqarnerpaajusut ilagaat, matumani eqaarsaartarfiup kantiinallu angissusaat atuartunik 300-nik inoqarsinnaasut ilanngullugit apeqqutigineqarlutik.
Perusuersartarfiit nutaat apeqqutigineqarput aamma nerisassat akeqannginnerat ingerlatiinnarneqassanersoq apeqqutigineqarpoq, akeqassanngitsullu Uffep oqaatigaa. Aqutsisut ilaannit eqaarsaartarfissaq nutaaq oqaluttuarineqarmat, apeqqutigineqartut ilagaattaaq ”Målertarfiit netseqarpat?”.
Aserorterisoqannginnissaa ataatsimoorussamik qulakkeerniarlugu atuartut qanoq siunnersuuteqarsinnaanersut aperineqarputtaaq.
Naggataarutaasumik atuartut apeqquteqarluarsimanerat pillugu atuarfiup pisortaanit Uffe Linholmimit qutsavigineqarput taavalu meeqqanut inersimasunullu atuarfiup aallartinneqarnissaata ataatsimoorunneqarnera nuannaarutiginerarlugu. “Apeqqutissinnut pitsaaqisunut qujanarujussuaq,” Uffe oqarpoq. “Aallartinnissatsinnut qilanaaqaagut.”
Sapaatip akunnera 27 tamaat atuartunut, sulisunut angajoqqaanullu tamanut takornarniartitsineq ingerlanneqassaaq/ingerlanneqarsimavoq. Atuarfik Inussummi 14. aggusti 2024-mi ulloq atuarfiusoq siulleq aallartippat atuarfiup innuttaasunut tamanut pisortatigoortumik atoqqaartinneqassasoq naatsorsuutigineqarpoq.