Ataasinngormat unnukkut Katuami Hans Lyngep inersuani inoqarluartumi inuit saallugit danskip avataarsualiartartup Andreas Mogensenip kalaallit erfalasuanni immaqa aatsaat taama angallanneqarsimatigisoq Nunatta Katersugaasiviani pisortaanermut Daniel Thorleifsenimut tunniuppaa. Erfalasoq, Mogensenip nunat assigiinngitsut rumstationianni ISS-imut ilaanermini nassarnikuuaa, nunarsuarput qaammatini tallimani ullormut 16-eriarluni kaajallattarsimavaa.
Andreas Mogensenip kalaallit erfalasuannik nassarnermi saniatigut aamma danskit savalimmiormiullu erfalasui avataarsualiartaammut nassarsimavai. “Avataarsualiarnerni siullermi danskit erfalasuat kisiat nassarpara, kingullermilli angalaqataaninni kalaallit savalimmiormiullu erfalasui nassarnissaat pingaartippara, naalagaaffeqatigiinnitsinnimi tamanna pingaartuusorigakku,” Mogensen oqaluttuarpoq.
Erfalasumik tunniussinissaq sioqqullugu naalagaaffeqatigiinni siullersaalluni avataarsualiarsimasoq avataarsualiarnermini misigisimasani pillugit 1 tiimimik sivisussusilimmik oqalugiarpoq. Avataarsualiartaammi ulluinnarni inuuneq pillugu oqaluttuarpoq, oqimaassuseqanngitsutut misigisaq qanoq innersoq, avataarsuaniit nunarsuatta isikkua kiisalu avataarsualiarluni ilisimasassarsiornermi nunarsuatsinni inuunitsinnut qanoq sunniuteqarnersoq. Aammattaaq nunarsuatta avataaniit takunikuuneratigut nunarsuatsinnut isiginneriaatsiminut qanoq sunniuteqarsimanersoq nassuiaatigalugu. “Nunarsuaq angerlarsimaffigiinnanngilarput. Angerlarsimaffituaraarpummi. Nunarsuarput aserorutsigu allamukarfissaqarnavianngilagut. Nunarsuatta qanittuani assingusinnaasumik soqanngilaq,” Mogensen oqarpoq.
Aaqqissuussaq Kommuneqarfik Sermersooq suleqatigalugu aaqqissuunneqarpoq, borgmesterilumi Avaaraq Olsen tikilluaqqusisuuvoq.
