Kommunimut pilersaarummut tapiliussaq 30B4- Tasiilami immikkoortoq inuussutissarsiuteqarnermut talittarfeqarnermullu siunertamut atugassiaq atorneqarsinnaalernera pillugu nalunaarut 

Sumiiffimmi 30B4 – Tasiilami immikkoortoq inuussutissarsiuteqarnermut talittarfeqarnermullu siunertamut atugassiami inuussutissarsiorfissamik nunaminertamik maanna qinnuteqartoqarsinnaalerpoq.

• Sanaartorfissiaq Inuussutissarsiuteqarfimmi 30B4-imi  – Tasiilami immikkoortoq inuussutissarsiuteqarnermut talittarfeqarnermullu siunertamut atugassiaq, sanaartorfiusinnaanngornera kommunimiit matumuuna nalunaarutigineqarpoq.
• Sanaartorfissaq 1: 18.219 m2, talittarfissatut umiarsualiveqarfissatullu sanaartorfissiaq 3.060 m2-isut annertutigisoq ilanngullugu

Sumiiffimmut suut atuuttuunersut paasilluarnissaa pingaartuummat, kommunimut pilersaarummut tapiliussaq 30B4 – Tasiilami immikkoortoq inuussutissarsiuteqarnermut talittarfeqarnermullu siunertanut atuarneqarsinnaavoq.

Kommunimut pilersaarummut tapiliussaq Sanarfinermut Avatangiisinullu Ingerlatsivik saaffigalugu pissarsiarineqarsinnaavoq, imaluunniit kommunip nittartagaani https://kp.sermersooq.gl-imi atuarneqarsinnaavoq.

Kommunimut pilersaarummut tapiliussami nassuiaammi aamma aalajangersakkanit tigulaakkat:
Immikkoortoq 2,3 ha. missaani annertussuseqarpoq. Immikkoortoq 9.000 m2 missaanni inissaqassuseqarpoq, sanaartukkalli inernera apeqqutaassaaq.  Sanaartorfissaq kommunimut pilersaarummut tapiliussami atorneqareersimappat, allanut inissaqartitsinani tamakkiisumik sanaartorfiusutut naatsorsuunneqassaaq.

Immikkoortut inuussutissarsiutinut aammalu/imaluunniit umiarsualiveqarnermut siunertarineqartut allaffeqarfinnut, sanaartugassanik suliakkerneqartartunut, quersuarnut, sanasunut, sannavinnut, nioqqutissiornernut, assartuinernut, suliffissuarnut, uninngasuutaasivinnut, engrossimik niuertunut, tankeqarfimmut, aalisakkerivimmut, talittarfeqarnermut puttasunullu, amutsiveqarfinnut, usingiartunut, uninngasuutissanut teknikkikkullu sanaartukkanut siunertanut atorneqarsinnaapputtaaq.

• Immikkoortoq helikopterip mittarfiata eqqaani assiaqutitaqanngitsumiippoq (timmisartuussisarfiup nalaani allatigullu aqqutaasut) – takuuk Ilanngussaq 1. Timmisartuussisarfiup nalaani illut sanaartugassallu allat kote 53,3 qaangissanngilaat.
• Sanaartornermi quleriit marlunnik affarmillu portunerpaamik portussuseqassaaq.

Qinnuteqartut uku eqqumaffigissavaat:

• Kinaluunniit inatsisitigut pisinnaatitaasoq, inuit ataasiakkaat, suliffeqarfik, ingerlatseqatigiiffik imaluunniit peqatigiiffik nunaminertamik atugassinneqarnissamik qinnuteqarsinnaavoq, ilaquttatut qanigisap arlalinnik qinnuteqaateqarsinnaannginnera eqqumaffigiuk.
• Makitsinermi qinnuteqarsinnaatitaasut tamarmik makitsinissamut ataatsimik peqartarnerat  tunngaviusarpoq. Taamaalillunilu katissimallugu aapparisaq, inuk inoqutigiinneersoq, inuit allat qinnuteqaammut tunngatillugu imaluunniit toqqaannartumik attuumassuteqartut – ataatsimoorussamik soqutigisaqaqateqartut, imaluunniit ingerlatseqatigiiffinnut inunnullu ingerlatseqatigiiffimmiittunut – piginnittutut imaluunniit ingerlatseqatigiiffiup aqunneqarneranut ilaasut – allalluunniit ingerlatseqatigiiffimmut taassumaluunniit aqunneqarneranut qanimut attuumassuteqartut makitsinermi peqataatinneqarsinnaanngillat, nunaminertanut ataasiakkaanut ataasiinnarmik qinnuteqaateqartoqarsinnaammat. Aamma suliffeqarfissuarnut tamanna atuuppoq. Assersuutigalugu aappariinnut marluusunut, imaluunniit ingerlatseqatigiiffimmut taassumalu pisortaaneranut imaluunniit ingerlatseqatigiiffinnut marlunnut ataatsimik pingaarnertut aningasaliisoqartunut il.il. immikkut qinnuteqarnissaq inerteqqutaavoq.
• Qinnuteqaateqartoq nunaminertanik sanaartorfiunngitsunik peqaruni, nunaminertanik sanaartorfiunngitsunik allanik pisariaqartitsineq allaqqunneqarsinnaanngitsumik uppernarsaasiissaaq, aammalu nunaminertani siornatigut atugassiissutaasimasuni sanaartorneq annertuumik kinguarsarneqarsimappat, qinnuteqaatip itigartitsissutiginissaanut ingerlatsivik pisinnaatippoq.
• Qinnuteqartoq pisortanut akiitsoqarsimaguni, matumanilu sanaartorfigissaanissamut piginneqataalluni akilersimanngisaminik, qinnuteqaatip itigartitsissutiginissaanut ingerlatsivik pisinnaatippoq. Qinnuteqartoq suliffeqarfiusimaguni qulaani taaneqartut atuutsillugit, tassa suliffeqarfik, suliffeqarfiup piginnittua, inuit aqutsisunut ilaasut imaluunniit inuit suliffeqarfimmi aalajangiisutut sunniuteqartut, pisortanut akiligassaminnik akiitsoqanngitsut.

Qinnuteqaateqarfissaq qaangiuppat qinnuteqaat ammarneqassaaq, tassanilu malittarisassat eqqortumik malinneqarsimanersut nalilerneqassaaq. Eqqortumik malinneqarsimannginnera paasineqarpat, qinnuteqartoq malittarisassanik unioqqutitsisoq peqataajunnaarsinneqassaaq.

 
Qinnuteqaammut ilanngunneqassapput

• Pilersaarummik allaaserinninneq, makku imaralugit:
  • Illumik atuineq pillugu allaaserinninneq kiisalu sanaartukkap m2-imut annertussusaata katinnera
    • sanaartorfissap ataatsimut qanoq atornissaanik allaaserinninneq. Matumani pineqarput sanaartukkap annertussusaa kiisalu taassuma avataani nunaminertat atugassaritinneqartut. 
    • Sanaartornissamut piviusorsiortumik piffissamik pilersaarusiorneq, nunaminertamik atuinissamut inniminniinermut nunaminertamillu atugassinneqarnermut piffissaritinneqartunik atuuttunik malinnittumik.
• Aningaasaliisinnaassuseqarnermik uppernarsaat. Qinnuteqartup sanaartugassatut qinnuteqaatip piviusunngortinnissaanut aningaasatigut periarfissani uppernarsassavai inatsisit malillugit piffissaliunneqartup iluani.  Aningaaserivik, imaluunniit aningaaserivik alla uppernarsaassaaq, aningaaseriviup imaluunniit aningaaseriviup allap naliliinera naapertorlugu qinnuteqartoq, qinnuteqarnerata nalaani aningaasaqarneranik sukumiisumik nalilersorneqarsimasoq – pisariaqanngitsumik unitsinneqarani – nunaminertami qinnutigineqartumi sanaartornissap piviusunngortinneqarnissaanut periarfissaqartoq. Uppernarsaanermi qinnuteqartup ukiuni arlalinni atorunnaarsinneqarsinnaanngitsumik attartortitsisuunini pillugu aalajaatsumik attartortoqarnera imaluunniit pissutsit tassunga assingusut apeqqutaatinneqassanngillat. Sanaartugassap aningaasalerneqarnissaanut qinnuteqartup nammineq aningaasaqarnera naapertuutissaaq. Aningaaserivik imaluunniit aningaaserivik alla uppernarsaanermini inatsisitigut taamatut qinnuteqartumut pisussaaffeqannginneraasinnaanngilaq – uppernarsaatip tutsuiginassusia eqqarsaatigalugu akiliisinnaassuseqarnermut aalajangiinermi tunngaviit nalinginnaasut naapertorlugit aningaaserivik naliliisussaatitaammat.
• Pisortanut akiligassanik akilerneqanngitsunik peqannginnermut tunngasunik ilumoorluinnarluni uppernarsaaneq. 
• Qinnuteqaatit taakkuninnga paasissutissanik uppernarsaatinillu imaqartut kisimik akuerineqartussatut ilanngunneqassapput. Qinnuteqaatip tamakkiisuunissaa eqqortumillu paasissutissiinissaq qinnuteqartup akisussaaffigaa. Qinnuteqarfissatut piffissaritinneqartoq qaangiutsinnagu qinnuteqaatit kommunip misissorneq ajorpai.

Qinnuteqaatit tamarmik 31. maj 2024 sioqqullugu imaluunniit kingusinnerpaamik ulloq taanna nal. unnuap qeqqartinnagu tiguneqarsimasut ataatsikkut tiguneqartutut isigineqassapput. Qinnuteqaatit 31. maj 2024 -mi unnuap qeqqata kingornagut tiguneqartut ilaatinneqassanngillat.

Atugassiinerup ingerlanneqarnera

Piumasarineqartunik naammassinnissimasut akornanni Kommuneqarfik Sermersooq makitsissaaq qinnuteqarnissamut piffissaliussap kingornagut ilimagisamik sapaatip-akunneri ataaseq, marluk tikillugit. Qaqugu makitsisoqassanersoq pillugu qinnuteqartut nalunaarfigineqarumaarput. Makitsineq kikkunnut tamanut ammavoq kommunillu nittartagaatigut facebookikkullu qupperneratigut nalunaarutigineqarumaarluni.

Aammattaaq Kommuneqarfik Sermersuup nunaminertamik atugassiisarnermik nalinginnaasumik aalajangersagai innersuussutigineqarput. http://www.kp.sermersooq.gl

Annertunerusumik paasissutissat Sanarfinermut Avatangiisinullu Ingerlatsivimmut paasiniarneqarsinnaapput, sai@sermersooq.gl

Nunaminertamik inniminniiniarluni qinnuteqaat uunga nassiunneqassaaq, Kommuneqarfik Sermersooq, Sanarfinermut Avatangiisinullu Ingerlatsivik, Postboks 1005, 3900 Nuuk, imaluunniit elektroniskimik uunga sai@sermersooq.gl