Maanna 30B3 – Tasiilami Eqqaavimmut eqqaani inuussutissarsiuteqarfimmut nunaminertanik atuinissamut qinnuteqarfiusinnaalerpoq.
Inuussutissarsiuteqarfimmi 30B3 – Inuussutissarsiuteqarfik Eqqaavimmut eqqaani Tasiilami sanaartorfissaq kommunip maanna saqqummiuppaa, ima annertussusilik:
- Sanaartorfissaq 1: 1.225 m2 sanaartorfissaq annerpaamik 612,5 m2-iulluni
Kommunimut pilersaarummut tapiliussami immikkoortoq 30B3 – Inuussutissarsiuteqarfik Eqqaavimmut eqqaani Tasiilami pillugu immikkoortumi suut atuuttuunersut sukumiisumik atuarlugu paasiniarluarnissaa pingaaruteqarpoq.
Kommunimut pilersaarummut tapiliussaq Sanarfinermut Avatangiisinullu Ingerlatsivik saaffigalugu pissarsiarineqarsinnaavoq, imaluunniit kommunip nittartagaani https://kp.sermersooq.gl atuarneqarsinnaavoq.
Kommunimut pilersaarummut tapiliussami nassuiaammi aamma aalajangersakkanit tigulaakkat:
Sumiiffik inuussutissarsiuteqarfittut ilaatigut sanaartorfioreerpoq. Nunaminertaq 5,2 ha-it missaannik annertutigaaq aamma 1 missaanik sanaartugassaq.
Immikkoortup inuussutissarsiutinut siunertarineqartut allaffeqarfinnut, sanaartugassanik suliakkerneqartartunut, quersuarnut, sanasunut, sannavinnut, nioqqutissiornernut, uninngasuusivittut assartuinernullu kiisalu suliffissuarnut atorneqarnissaa aalajangiunneqassaaq.
Immikkoortoq 10.000 m²-imut sinneruttumik inissaqarpoq, illuliap inaarutaasumik ilusilersorneqarnera apeqqutaatillugu. Matuma qulaani sanaartorfissat atorneqareerpata, immikkoortoq tamakkerluni sanaartorfigineqareersutut sinneruttunillu inissaqartitsiffiunngitsutut isigineqalissaaq.
Nutaamik sanaartornerni 2 ½ angullugit portussusilinnik imaluunniit portunerpaamik 10 meterinik sanaartortoqarsinnaavoq.
Qinnuteqartut uku eqqumaffigissavaat:
- Kinaluunniit inatsisitigut pisinnaatitaasoq, inuit ataasiakkaat, suliffeqarfik, ingerlatseqatigiiffik imaluunniit peqatigiiffik nunaminertamik atugassinneqarnissamik qinnuteqarsinnaavoq, ilaquttatut qanigisap arlalinnik qinnuteqaateqarsinnaannginnera eqqumaffigiuk.
- Makitsinermi qinnuteqarsinnaatitaasut tamarmik makitsinissamut ataatsimik peqartarnerat tunngaviusarpoq. Taamaalillunilu katissimallugu aapparisaq, inuk inoqutigiinneersoq, inuit allat qinnuteqaammut tunngatillugu imaluunniit toqqaannartumik attuumassuteqartut – ataatsimoorussamik soqutigisaqaqateqartut, imaluunniit ingerlatseqatigiiffinnut inunnullu ingerlatseqatigiiffimmiittunut – piginnittutut imaluunniit ingerlatseqatigiiffiup aqunneqarneranut ilaasut – allalluunniit ingerlatseqatigiiffimmut taassumaluunniit aqunneqarneranut qanimut attuumassuteqartut makitsinermi peqataatinneqarsinnaanngillat, nunaminertanut ataasiakkaanut ataasiinnarmik qinnuteqaateqartoqarsinnaammat. Aamma suliffeqarfissuarnut tamanna atuuppoq. Assersuutigalugu aappariinnut marluusunut, imaluunniit ingerlatseqatigiiffimmut taassumalu pisortaaneranut imaluunniit ingerlatseqatigiiffinnut marlunnut ataatsimik pingaarnertut aningasaliisoqartunut il.il. immikkut qinnuteqarnissaq inerteqqutaavoq.
- Qinnuteqaateqartoq nunaminertanik sanaartorfiunngitsunik peqaruni, nunaminertanik sanaartorfiunngitsunik allanik pisariaqartitsineq allaqqunneqarsinnaanngitsumik uppernarsaasiissaaq, aammalu nunaminertani siornatigut atugassiissutaasimasuni sanaartorneq annertuumik kinguarsarneqarsimappat, qinnuteqaatip itigartitsissutiginissaanut ingerlatsivik pisinnaatippoq.
- Qinnuteqartoq pisortanut akiitsoqarsimaguni, matumanilu sanaartorfigissaanissamut piginneqataalluni akilersimanngisaminik, qinnuteqaatip itigartitsissutiginissaanut ingerlatsivik pisinnaatippoq. Qinnuteqartoq suliffeqarfiusimaguni qulaani taaneqartut atuutsillugit, tassa suliffeqarfik, suliffeqarfiup piginnittua, inuit aqutsisunut ilaasut imaluunniit inuit suliffeqarfimmi aalajangiisutut sunniuteqartut, pisortanut akiligassaminnik akiitsoqanngitsut.
- Qinnuteqaateqarfissaq qaangiuppat qinnuteqaatit ammarneqarpata malittarisassat eqqortumik malinneqarsimanersut nalilerneqassaaq. Malittarisassat malinneqarsimanngitsut paasineqarpat qinnuteqartut malittarisassanik unioqqutitsisut peerneqassapput.
Qinnuteqaammut ilanngunneqassapput
- Pilersaarummik allaaserinninneq, makku imaralugit:
- Sanaartukkanut atuinissamut kiisalu sanaartukkap ataatsimut m2-ia pillugu nassuiaat
- Sanaartorfissap ataatsimut qanoq atornissaanik allaaserinninneq. Tassani ilaatinneqarput sanaartukkap silataani nunaminertat ilanngullugit, matumanilu biilinut inissiiviit.
- Sanaartornissamut piviusorsiortumik piffissamik pilersaarusiorneq, nunaminertamik atuinissamut inniminniinermut nunaminertamillu atugassinneqarnermut piffissaritinneqartunik atuuttunik malinnittumik.
- Aningaasaliisinnaassuseqarnermik uppernarsaat: Qinnuteqartup sanaartugassatut qinnuteqaatip piviusunngortinnissaanut aningaasatigut periarfissani uppernarsassavai inatsisit malillugit piffissaliunneqartup iluani. Aningaaserivik, imaluunniit aningaaserivik alla uppernarsaassaaq, qinnuteqartoq qinnuteqarnerata nalaani aningaasalersuisinnaasoq pisariaqanngitsumik unitsitsinani qinnutigineqartumi sanaartornissap piviusunngortinneqarnissaanut periarfissaqartoq. Uppernarsaanermi piumasaqaatitaqassanngilaq qinnuteqartup ukiuni arlalinni atorunnaarsinneqarsinnaanngitsumik attartortitsisuunini pillugu aalajaatsumik attartortoqarnera imaluunniit pissutsit tassunga assingusut apeqqutaatinneqassanngillat. Sanaartugassap aningaasalerneqarnissaanut qinnuteqartup aningaasaqarnera naammassaaq. Uppernarsaat aningaaseriviup inatsiseqartitsinikkut pisussaaffianik nangaassummik imaqassanngilaq – aningaaseriviup uppernarsaatip suliamut tunnganeranut pituttugaavoq akiliisinnaanermut piumasaqaatinut nalinginnaasunut tunngatillugu.
- Pisortanut akiligassanik akilerneqanngitsunik peqannginnermut tunngasunik ilumoorluinnarluni uppernarsaaneq.
Qinnuteqaatit taakkuninnga paasissutissanik uppernarsaatinillu imaqartut kisimik akuerineqartussatut ilanngunneqassapput. Qinnuteqaatip tamakkiisuunissaa eqqortumillu paasissutissiinissaq qinnuteqartup qulakkiissallugu akisussaaffigaa. Kommune qinnuteqaatinik qinnuteqarfissap naannginnerani nakkutilliisanngilaq.
Qinnuteqaatit tamarmik 31. maj 2024 sioqqullugu imaluunniit kingusinnerpaamik ulloq taanna nal. unnuap qeqqartinnagu tiguneqarsimasut ataatsikkut tiguneqartutut isigineqassapput. Qinnuteqaatit 31. maj 2024 unnuap qeqqata kingornatigut tiguneqartut ilaatinneqassanngillat.
Atugassiinerup ingerlanneqarnera
Piumasarineqartunik naammassinnissimasut akornanni Kommuneqarfik Sermersooq makitsissaaq qinnuteqarnissamut piffissaliussap kingornagut ilimagisamik sapaatip-akunneri ataaseq, marluk tikillugit. Qaqugu makitsisoqassanersoq pillugu qinnuteqartut nalunaarfigineqarumaarput. Makitsineq kikkunnut tamanut ammavoq kommunillu nittartagaatigut facebookikkullu qupperneratigut nalunaarutigineqarumaarluni.
Aammattaaq Kommuneqarfik Sermersuup nunaminertamik atugassiisarnermik nalinginnaasumik aalajangersagai innersuussutigineqarput. http://www.kp.sermersooq.gl
Annertunerusumik paasissutissat Sanarfinermut Avatangiisinullu Ingerlatsivimmut paasiniarneqarsinnaapput, sai@sermersooq.gl
Nunaminertamik inniminniiniarluni qinnuteqaat uunga nassiunneqassaaq, Kommuneqarfik Sermersooq, Sanarfinermut Avatangiisinullu Ingerlatsivik, Postboks 1005, 3900 Nuuk, imaluunniit elektroniskimik uunga sai@sermersooq.gl