Ukiuni kingullerni immikkut sammisaqarnerit arlallit ingerlanneqareernerisa kingorna Kommuneqarfik Sermersuumi Kommunalbestyrelse Meeqqanut Ilaqutariinnullu Politikkip nutaap ilusilersornissaanut suliaqarnissamut maanna piareerpoq. Politikkimi ukiuni qulini tulliuttuni atuuttussami tunngaviusussat naleqartitat anguniagassallu suussusersinissaanut immikkut sammisaqarnerit taakku pingaaruteqarluinnarsimapput.
“Immikkut sammisaqarnerni arlalinni ilisimasanik katersineq apeqqutinillu pingaarnernik oqaluuserinninneq ukkappagut. Immikkoortoq taanna naammassisimalermat massakkut politikkip allannissaa aallartissinnaanngorparput,” borgmesteri Avaaraq Olsen oqarpoq.
Immikkut sammisaqarnerit workshoppertitsinernik saqqummiinernillu imaqarput, taakkunani peqataasunit sammisat soorlu inuusuttut akornanni pinerluttarneq, pitsaaliuinermi suliniutit aamma meeqqat ilaqutariillu kommunimi unammillernartut misigisartagaat eqqartorneqarput. Najukkami ilisimasallit soqutigisallillu ilisimasaminnik misilittakkaminnillu tunniussaqarput.
Najukkami ilisimasallit soqutigisallillu saniatigut inuusuttut aamma tunniussaqarput. Inuusuttut Kommunalbestyrelsiat februaarimi ataatsimiinnerani.
”Innuttaasut inuusuttuaqqanut allaat peqataatinneqarnissaat pingaaruteqarpoq. Taakkuummatami ulluinnarminnik aamma unammillernartunik misigisartakkaminnik ilisimasaqarnerpaat,” borgmesteri Avaaraq Olsen oqarpoq.
Ilaqutariit ilivitsuutillugit ukkataralugit siunissamut ungasinnerusumut aaqqiissutissat, kommunimi meeqqanut inuusuttunullu toqqissisimanartumik tapersersuisumillu sinaakkusiisinnaasut sulissutiginissaat politikkimi nutaami pingaarnertut anguniagaavoq. Politikkip allanneqarnera suli naammassinngilaq, suliarli ingerlanneqaleruttorpoq aamma kommunalbestyrelsimit siuariarnerit naammagisimaarneqarput.
“Meeqqanut Ilaqutariinnullu Politikkip nutaap annertuumik imaqarnissaa aamma attanneqarsinnaasuunissaa qulakkeerniarlugu sukumiisumik suliaqarpugut. Massakkullu paasissutissat taakkua tamaasa periusissianngornissaannut iliuusinngornissaannullu piareerpugut” Avaaraq Olsen nangippoq.
Kommunimi meeqqanut ilaqutariinnullu aaqqiissutissat siunissamut ungasinnerusumoortuunissaannut pitsaasuunissaannullu politikkissaq nutaaq qulakkeerinneqataassasoq kommunalbestyrelsimit naqissuserneqarpoq. Immikkut sammisaqarnerni isummersuuterpassuaqarnikkut tunngavik inissinneqarpoq, sulinissartavialu aallartissinnaanngorluni.
