Kommuneqarfik Sermersooq isumasioqatigiissitsinermik “Inuuneq pitsaasoq ataatsimoorullugu” qulequtalimmik aaqqissuussissaaq ulluni 2. aamma 3. juuni 2024 Nuummi Hotel Hans Egedemi. Isumasioqatigiinnermi Kommuneqarfik Sermersuumi inoqarfinni minnerni siuarsaanermi suliniutit aamma najukkami iliuusissatut pilersaarutit eqqartorneqarnissaat siunertarineqarpoq.
”Inoqarfinnut mikinernut ineriartortitsinissamik periusissiaq 2024-2028”-mut siunnersuut aallaavigalugu programmi ilusilersorneqarpoq, tassanilu siunertarineqarpoq periusissiami anguniakkat iliuuseqarfiginissaat siunertaralugu susassaqartut tassaasut Kommune, qinikkat minnerunngitsumillu innuttaasut peqatigalugit suliassat aaqqissuunneqarnissaat.
Isumasioqatigiinneq sapaammi ulloq 2. juuni Borgmester Avaaraq Olsen tikilluaqqusilluni oqalugiartoralugu ammarneqassaaq, kingornatigut isumasioqatigiinnermi oqaluuserisassat saqqummiunneqassapput. Ukkatarineqartussanut ilaapput 2024 – 2028-mi inoqarfinnut minnernut ineriartortitsinissamik periusissiamut siunnersuut, suleqatigiinneq pillugu isummersuutinik saqqummiineq aamma najukkami suliniutit iliuusissatullu pilersaarutit.
Periusissiami anguniakkat ilaanni pineqarpoq “Qanimut oqartussaaqataaneq, suleqatigiinneq aamma iliuuseqarsinnaaneq” isumasioqatigiinnermilu pingaarutilimmik inissisimassalluni.
Peqataasut workshoppissapput, inoqarfinni ataasiakkaani iliuusissatut pilersaarutinik suliaqassallutik. Inoqarfinnut minnernut pisortat tamanut ataatsimoorussamik sullissiveqarnerannut ilusissaq pillugu misiliutigalugu suliniutip aallartisarneqarnissaa aamma eqqartorneqassaaq
Borgmesteri Avaaraq Olsen oqarpoq: “Kommunitsinni Nunaqarfimmi Aqutsisut isumasioqatigiissinneqartarnerini pitsaasunik ileqqoqalernikuuvugut, taamaattumik ullunut marlunnut pissarsiffiulluartussanut imaqarluartussanullu Nunaqarfimmi Aqutsisunut ilaasortat aamma KANUNUPE-mit sinniisuutitap peqatiginissaanut qilanaarpunga. Taassuma saniatigut inoqarfiit minnerit pillugit ineriartortitsinissamut periusissiaq pillugu siunnersuummut pissanganartumik sulineq aallartisassavarput. Nunaqarfimmi Aqutsisut aamma kommunimi ingerlatsiviit peqatigalugit aallartissavarput, soqutigisallit pingaarnerpaat, tassaasut sumiiffinni inoqarfinni najugallit peqataatinneqarnissaat tassani siunertaavoq.”
Inoqarfiit minnerit pillugit ineriartortitsinissamut periusissiaq pillugu siunnersuut aasap ingerlanerani tamanut tusarniaassutigineqassaaq, tassani pilersaarutaavoq Kommunip Nunaqarfimmi Aqutsisut peqatigalugit kommunimi inoqarfinni minnerusuni tamani annertuumik innuttaasunik peqataatitsissasoq.
Isumasioqatigiinneq naliliinertalerlugu ataasinngornermi 3. juuni naammassineqassaaq.