Nuummi ikuallaavissuaq nutaaq qaammammi ataatsimi misilittaasoqareernerani Nunatsinni sineriak tamakkerlugu eqqagassanik tigusisinnaalerpoq. Ikuallaavissuaq, ESANI A/S-imit ingerlanneqartoq, nuna tamakkerlugu eqqagassalerinermi annertuumik sunniuteqarnissaminut piareerpoq.
ESANI A/S Nunatsinni ikuallaavissuarnik marlunnik nutaanik sanaartortitsivoq. Nuummi ikuallaavissuaq Kommuneqarfik Sermersuumi kiisalu Kujallermit Qeqertalimmiillu eqqagassanik tamanik aallartisaatitut passussiviunissaminut piareerpoq. ESANI A/S-imi pisortaq Frank Rasmussen oqarpoq: “Ikuallaavissuaq qaammat ataaseq misilittareerparput, sivitsunngitsorlu tamakkiisumik ingerlalissaaq. Ikuallaavissuaq illoqarfinnit nunaqarfinniillu amerlasuunit eqqagassanik tigusisinnaalereerpoq piffissamilu misileraaffiusumi eqqagassat 1400 tonsingajaat ikuallareerpagut.”
Nuummi Sisimiunilu ikuallaavissuit assigiipput avataaniillu aqunneqarsinnaallutik, taamaattumillu pitsaasumik tatiginartumillu ingerlanneqarsinnaallutik. Sisimiuni ikuallaavissuaq ukioq ataaseq qaangiuppat atorneqarsinnaalernissaa naatsorsuutigineqarpoq. Ikuallaavissuit immikkut ullup unnuallu ingerlaneranni 60 tonsinik ikuallaasinnaapput tamannalu Nuummi ikuallaavitoqqamut ullormut 38 tonsit missaannik ikuallaasartumut sanilliullugu pitsanngoriaataavoq ersarissoq.
Avaaraq Olsen, Kommuneqarfik Sermersuumi borgmesteri, nuannaarutiginnippoq: “Kalaallit Nunaannut alloriarnerujussuuvoq. Ikuallaavissuit nutaat eqqagassalerinermik pitsanngorsaassapput avatangiisinullu sunniutissanik annikillisitsillutik.”
“Kinguaagut pillugit avatangiisit minguitsuunissaannut piujuartitsinermillu siunertaqarnitsinnut alloriarneruvoq pingaarutilik tamannalu peqataaffigisinnaagakku persuarsiutigeqaara,” taama oqarpoq borgmester Ane Hansen Kommune Qeqertalik.
”Ikuallaavissuit aallartisarniarlugit suliaqarnerup annertoqisup piviusunngortinneqarnera tulluusimaarutigalugulu nuannaarutigisinnaavarput. Kalaallit Nunaata minguinnerulernissaanik anguniagaqarnerput angujartorparput ESANI-milu pisortaqatigiit kommunit ataatsimut suliniuteqarnitsinni aallartinnermiillu siuariartorsimanitsinnut qutsavigerusuppakka,” Kommune Kujallermi borgmesteri Stine Egede oqarpoq.
Borgmester Malik Berthelsen sinnerlugu Kommunalbestyrelsimi ilaasortaq Siverth K. Heilmann ammaanersiornermi ikuallavissuarmik Nuumiittumik peqataatinneqarpoq, ilaatigullugu oqariartuutigalugu, “Sisimiuni sanaartorneq naammasseriarpat, tamakkiisumik Nunatsinni eqqiluinnerulernissaq tamakkiinerusumik ornitarput politikkikkut siunnerfigisimasarput isumalluarnaqaaq.”
ESANI A/S Nunatsinni assigiinngitsutigut eqqagassalerinermi aaqqiissutinik avatangiisimik piujuartitsisussanik nassaarniarluni sulissuteqarpoq. Ikuallaavissuit nutaat saniatigut Qaqortumi Maniitsumilu uuliakumik tigooraavimmik pilersitsinissaminnik kiisalu illoqarfinni nunaqarfinnilu tamani eqqagassanik ikuallanneqarsinnaasunik aallernissamut aaqqissuussinissamik qulakkeerinninnissamik pilersaaruteqarput.
Suliniut taanna siunissami Nunatsinni avatangiisip asseqanngitsup illersornerani teknologiit nutaaliaasut ikiuuteqataanerisigut piujuartitsinerulernissamut alloriarneruvoq pingaarutilik.
