Kommunalbestyrelse ukioq kingulleq aalajangerput Paamiuni inuusuttut kulturikkut illussaannik pilersitsisoqassasoq. Taanna apriilip 17-ianni ammaanersiorneqarpoq.
Paamiuni inuusuttunut ulloq apriilip 17-iat immikkuullarissuuvoq, tassa kulturikkut illussaat ammaanersiorneqarmat. Ammaanersiornermi innuttaasut amerlasuut peqataapput, ullukkut kaagillertoqarlunilu kaffillertoqarpoq unnukkullu tusarnaartitsisoqarluni.
”Inuusuttut kulturikkut illuat illoqarfitsinni tamanut sunniuteqarnissaa qularutiginngilara, inuusuttunuinnaanngitsoq kisialli innuttaasunut tamanut. Siunissami pikialaartitsineq nuannersoq misiginissaa qilanaareqaara”, Meeqqanut Atuarfeqarnermut aammalu Peqqinneq Sunngiffimmilu immikkoortortami aqutsisoq Dorthe-Marie Mogensen-Fontain oqarpoq.
Ullorli immikkuullarissup pinnginnerani isumagisassat arlaqarsimapput. Paamiuni inuusuttut kulturikkut illuannilu sulisut illup ammarnissaata tungaanut piareersarnermi inuusuttut peqatiserisimavaat.
”Uagutsinnut pingaaruteqarsimavoq illup ammarnissaata tungaanut sulinitsinni inuusuttut peqatiginissaat. Taakkuuppummi atuisussagut aammalu piginneqataasussaasut. Taakku illumi qalipaanermi assigiinngitsunillu piareersarnermut peqataasimapput”, Inuusuttut Kulturikkut Illuanni aqutsisoq Parnûna Rosing oqarpoq.
Borgmesteri Avaaraq Olsen Paamiunut angalanermini inuusuttut Majoriami/Piorsaavimmi ilinniartut oqaloqatigineqarani paasivaa inuusuttut ornittagarisinnaasaminnik amigaateqartut.
”Pisariaqartitsineq paasigatsigu atorfilittat peqatigalugit kommunip illuutai alakkartipallappagut paasiniarlugu ilumut piviusorsiornersoq ornittagassamik pilersitsinissaq. Qujanartumillu tamanna piviusorsiortuusoq paasivarput taamaattumillu pilersitsinissatsinnut kommunalbestyrelsemut siunnersuuteqarpunga.”, borgmesteri Avaaraq Olsen unnersiorpoq.
Siunnersuut kommunalbestyrelsemi oqallisigineqareerluni ilaasortanit tamanit akuerineqarpoq.
”Isumassarsiaq Paamiunut angalatillunga pinngortoq piviusunngortinneqarmat nuannaaqaanga. Paasisinnaavarpummi inuusuttut taqqavaneersut pisariaqartikkaa. Qilanaareqaara inuusuttut kulturikkut illuat alakkarternissaa”, borgmesteri Avaaraq Olsen naggasiivoq.
Paamiuni Inuusuttut Kulturikkut Illuat Kommuneqarfik Sermersuumi taamaattut aapparaat, siulleq Tasiilamiittoq Igdlomik ateqartinneqarpoq.
