Nuuk Maritime Networkip siulersuisuni nutaat maanna saqqummiuppai. Suliffeqarfiit kattuffiat, kommunip aamma najukkami suliffeqarfiit 70-it sinniisuutitaat.
Nuuk Maritime Network Nuummi imarsiornerup ineriartorneranut pingaaruteqarluinnartuuvoq. Suliffiit kattuffiat suliffeqarfiit assigiinngitsut imarsiornermik suliaqartut sinniisuutitaraat – tassunga ilanngullugu Kommuneqarfik Sermersooq, taamatuttaaq siulersuisuni sinniisuutitaqartoq. Sikuki Harbour Nuummut tunngatillugu, 1 mia. koruunit missaannik kaviiaartitaqarneq 1.900 missaannillu imarsiornermut attuumassuteqartunik sulisoqarneq, umiarsualiviup Nuullu sinnerani ineriartornerup pingaaruteqassusaanik takussutissiivoq.
Kommunimit suliffeqarfiit imarsiornermik suliaqartunik suleqateqarnissaq pingaartinneqarpoq. Suliassaqarfik illoqarfiup ineriartorneranut annertuumik sunniutilik. Tassunga atatillugu Kommuneqarfik Sermersuumi inuussutissarsiornermut pisortaq, Mads-Daniel Skifte oqaaseqarpoq:
“Soorunami Nuuk Maritime Networkimit piginnaasat pisariaqartut pingaaruteqartullu katersorneqarsinnaasimaneri nuannaarutigaarput tulluusimaarutigalugulu Taamaasilluta umiarsualivimmut tunngasunik illoqarfiullu sinnerani imarsiornermut tunngasunik ineriartortitsinermi ilisimasat pingaaruteqartut tammarnissaat pinngitsoortissavarput.”
Nangippoq: “Kommuneqarfik Sermersuumit umiarsualiviup kommunimut pingaaruteqassusaa ukkatarineqarpoq. Nuuk Maritime Network suleqatigiinnissamik isumaqatigiissummi, missingersuusiornermut isumaqatigiissummi allassimavoq illoqarfiillu pingaarnersaat pillugu periusissiami advisory boardimi ilaasortaalluni.”
Umiarsualivimmut talinnermi akiliutinik tulluarsaaneq
Siulittaasup nalunaarusiaa oqaluuserisassanik arlalinnik pingaarutilinnik imaqarpoq – tassunga ilanngullugu Nuuk Maritime Networkip Kalaallit Nunaanni umiarsualivimmut talinnermi akiliutinik tulluarsaanissamut suliniutaa, tassani siusinnerusukkut Nuummut talinneq marloriaammik akisunerusimavoq Kalaallit Nunaanni umiarsualivinnut sanilliullugu. Ullumikkut Nuuk Kalaallit Nunaanni umiarsualiviit assigalugit inissisimavoq.
“Umiarsualivimmut talinnermi akitsuutinut tunngatillugu Nuummi unammilleqatigiissinnaalernerput nunatsinnilu umiarsualiviit assigilersimaneri nuannaarutigaarput. Tamanna Nuummi ineriartortitsinermut pingaaruteqarluinnarpoq,” Mads-Daniel Skifte oqaluttuarpoq.
Siulersuisuni nikittoqalaarpoq
Ataatsimeersuarnerup kingulliup kingorna siulersuisut ukuninnga ilaasortaqalerput:
- Siulittaasoq Cuno Jensen, Qalut Vónin A/S-imi pisortaq
- Siulittaasup tullia Niclas Niclasen, Nuuk Transport A/S-imi pisortaq
- John Rasmussen, Sikuki Harbour A/S-imi pisortaq
- Bent Salling, Polar Seafood-imi pisortaq
- Mike Høegh, Masik-mi pisortaq
- Kristine Lange Lyberth, Eimskip-imi managing director
- Jesper Øraker, Greenland Escape Aps-imi pisortaq
- Mads-Daniel Skifte, najuuttoq, Kommuneqarfik Sermersuumi inuussutissarsiornermut pisortaq
- Kenneth Bøjler, najuuttussaq, Ineqarnermut Attaveqatigiinnermullu Naalakkersuisoqarfik
Takorluukkamut atortussat saqqummiunneqarneri
35-t takkuttut, ataatsimeersuaarnerup saniatigut umiarsualiviup siunissami isikkussaatut atuuffissaatullu takorluukkamut atortussamik titartakkamik saqqummiivigineqarput. Ataani takusinnaavat takorluukkamut atortussanit tigulaakkat.
