Nuuk sukkasuumik ineriartorpoq, borgmesterip Avaaraq Olsenip kommunalbestyrelse peqatigalugu illoqarfiup ineriartornera innuttaasunut tamanut iluaqutaanissaa qulakkiissallugu kissaatigaa. Taamaattumik ullutsinni unammillernartunik siunissamilu Kalaallit Nunaanni illoqarfiit pingaarnersaanni periarfissanik imaqartussamik nutaamik Nuummut illoqarfiit pingaarnersaat pillugu periusissiornissaq politikkikkut aalajangerneqarpoq.
Borgmesteri kommunalbestyrelsillu innuttaasut, suliffeqarfiit peqatigiiffiillu periusissiap nutaap, illoqarfiit pingaarnersaat pillugu periusissiap 2016-imeersup taartissaata suliarinerani peqataatinnissaat pingaartippaat.
“Suliap ingerlannerani inuiaqatigiit peqataatinnissaat uatsinnut pingaaruteqarluinnarpoq – Nuummi aamma avataani – periusissiap ataatsimullu takorluukkap tamanit tusarnaarfiunissaa naleqartitsiffiunissaalu kissaatigigatsigu,” borgmester Avaaraq Olsen oqarpoq.
Peqataatitsineq apriilip, maajip juunillu ingerlanerani ingerlanneqarnissaa pilersaarutaavoq, peqataatitsinerlu peqatigiiffilerinermi susassaqartitsinermilu, inuussutissarsiornermi, isumaginninnermi pingaarnertut suliassaqarfimmi illoqarfiullu ineriartornerani periarfissat pitsaasut qanoq suli qulakkeerinniinnarsinnaanitsinnut tunngassuteqassalluni.
“Uatsinnut pingaaruteqarpoq, periusissiatsinni tamakkiisumik isiginnittaaseqarnissaq, illoqarfiullu ineriartorneranik kiisalu kommunitut suliatsinni tamani piujuartitsinermik ataatsimoornermillu eqqarsaateqarfiusumik pingaarnertut suliatsinnik ineriartortitsinissaq pingaaruteqarluni.
Illoqarfiit pingaarnersaat pillugu periusissiamik suliaqarneq kommunip inoqarfiini anginerusuni Tasiilami, Paamiuni Ittoqqortoormiinilu illoqarfimmut periusissiornissamut misilittagaqalersitsissaaq.
Illoqarfiit pingaarnersaat pillugu periusissiaq nutaaq suliarinnittussarsiuunneqareersoq suliffeqarfiit Rambøll, Pikiala aamma TNT Nuuk suliarinnittussatut toqqarneqarput.