Atuarfik Inussuup matui atuartunut ukiup affaa sinnilaarlugu qaangiuppat ammarneqartussaapput. Sanaartorneq naammassiartuaarpoq, tassungalu atatillugu Meeqqanut Atuarfeqarnermullu Ingerlatsivimmi pisortap Lone Nukaaraq Møllerip kommunalbestyrelsemi ilaasortat atorfilittallu takornariartinniarlugit atuarfiullu ingerlanneqarneranut takorluukkat saqqummiunniarlugit qaaqquai.
Atuarfimmi pisortaq Uffe Lilholm atuartitsinermi periutsit nutaat, pisinnaasat suliniutillu aallaavigalugit ilinniartitsinerit kiisalu atuarfiup atuartunut ineriartorluarfiulluni ilikkagarfiunissaa pillugit oqaluttuarpoq. Uffe Lilholmip aamma oqaluttuaraa Atuarfik Inussummi init atuaqatigiinnut iniunatik faginik aalajangersimasunik atuartitsviussasut, assersuutigalugu ini atuaqatigiit aalajangersimasunit inigineqarani kisiannili tamanit matematikkertarfittut imaluunniit pinngortitalerinermut atorneqartassallutik.
Atuartut angusaannik ingerlalluarnissaannullu pitsanngorsaanissamut pilersaarusiassat aamma eqqartorneqarput, assersuutigalu atuarfiit atuarnerup kingorna ornittakkat (AKO)/perorsaasullu qanimut suleqatiginerunissaat.
Pulaarnermi erseqqissaatigineqarputtaaq Kalaallit Nunaanni innuttaasut timimik aalatitsinerpaanngornissaanut anguniagaqarnerup pingaaruteqassusia, atuarfimmi atuartitsinermi timimik atuinerunissaq anguniarneqarluni. Kommunimi aamma pingaartinneqarpoq, atuarfik timersoqatigiiffinnit iluaqutigineqarnissaa, assersuutigalugu eqaarsaartartut atuarfittaassami ”angerlarsimafeqarlissapput”.
Aqutsisoqatigiinniit saqqummiunneqartut takutippaat, avataaniit najukkamiillu isumassarsiorluarsimanerit, atuarfik pilersinneqartussaq tassaassasoq tassani atuartut ilinniartunngoriaannaanissamut piareersarneqarsimasut ingerlalluartullu.
