Paamiut pillugu tamakkiisumik pilersaarut nutaaq januaarip 23-anni akuerineqarpoq. Tamakkiisumik pilersaarummi Paamiut siunissami ineriartortinneqarnissaanut kissaatit 46-t akuerineqarput. Tamakkiisumik pilersaarummut kissaatit Paamiuni suliniuteqartartut suleqatigalugit suliarineqarput.
Tamakkiisumik pilersaarummi Paamiut erseqqissaassutigineqassaaq, peqatigitillugulu siunissami suliniutaasussat kommunimut pilersaarummi ilanngunneqartussat ilanngullugit allaaserineqassallutik. Paamiuni suliniuteqartartut illoqarfimmi innuttaasut peqatigalugit 2023-mi marsimi akuutitsinermi ataatsimiisitsisoqarneranut aggersarneqarput. Tassani periarfissinneqarput Paamiuni suliffissaqartitsinermi ineriartortitsinissamut peqataanissamut. Illoqarfimmiunik akuutitsisoqarneratigut nutaanik kissaatinik apuuttoqarpoq, soorlu nutaamik street-skatertarfittaarnissaq aamma aqqusineeqqani pitsaanerusumik qaammaqqusersuinissaq ilaatigut akuerineqarput.
”Paamiuni innuttaasut tamakkiisumik pilersaarusiornermut akuutinneqarnissaannik aggersaasimaneq pingaaruteqarluinnartuuvoq. Ilisimasat, isummat kissaatillu naleqarluartut saqqummiussorneqarput, taakkulu tamakkiisumik pilersaarusiornermi tunngaviullutik” taama oqarpoq Justus Hansen Aningaasaqarnermut Inuussutissarsiornermullu Ataatsimiititami siulittaasumut tulliusoq.
Ilaatigut pilersaarusiornermut periusissiaq aamma Naalagaaffiit Peqatigiit nunarsuarmi anguniagaanni 11 aamma sumiiffimmi innuttaasut aallaavigalugit tamakkiisumik pilersaarut siunissami attaveqaasersuutitigut suliniutissanik illoqarfiullu qeqqani uummaarissuutitsinissamik imaqarpoq. Illoqarfiup qeqqani uummaarissuutitsinissaq ilaatigut meeqqanut inuusuttunullu silami sammisassaqartitsisarnissamik pilersitsiviussaaq. Suliniutinut nutaanut peqatigitillugu aamma sumiiffiit eriagisassallit qitiutinneqartunut ilaapput. Assersuutigalugu umiarsualivitoqqami katersugaasiviullu nalaani oqaluttuarisaanermi pingaarutilinnik pitsanngorsaaneq.