Sila pissutigalugu ajornartorsiutinik peqaraluartoq inuusuttut kommunalbestyrelsiata ataatsimiinnera siulleq iluatsilluarpoq, kommunillu suliassaqarfiini arlalinni innersuussusiortoqarluni.
Silap allanngorarnera naatsorsuutigisamit ajornartorsiutaanerusimavoq. Inuusuttut kommunalbestyrelsianni ilaasortat tunumeersut Nuummut angalanissaat ullunik ataasiakkaanik nikisinneqarpoq tamannalu pilersaarutaasunik allannguinermik kinguneqarpoq. Aaqqiissummilli sukkasuumik nassaartoqarpoq, videokkullu attaveqaasersuisoqapallappoq, taamaalillutik ilaasortat silap aaqqinnerani Nuummut angalannginnerminni sammisanik attuumassutilinnik eqqartuisinnaaniassammata. Ajornartorsiut kommunimi politikerinit ilisimaarilluarneqarpoq.
Pilersaarutinik allannguisoqaraluartoq ileqqut malillugit, ilaasortat imminnut ilassinnginnerini ataatsimiinneq kommunalbestyrelsimi ukioqqortunerpaamit ammarneqarpoq, kingornalu borgmesteri tikilluaqqusilluni. Ulloq ataatsimiiffiusoq siulleq nipaatsumik ingerlanneqanngilaq; matumani ilaasortat kommunimut kommunillu qanoq ingerlanneqarneranut ilisaritinneqarput, tamannalu eqqaamallugu suliaq siulleq aallartippaat. Matumani meeqqat inuusuttullu inuunerannik pitsanngorsaanissamut innersuussummik suliaqarput. Suliassaqarfik ilaasortanit ilisimaarineqarluartoq.
Ullup aappassaani ataatsimiittoqanngilaq, ilaasortanut arlalinnut angalaffiummat. Ullut pingajuanni ilaasortat suliatik nangippaat, suliassaqarfinnilu pingaarnersiorneqartariaqarsorisaminnik namminneq innersuussusiornissaminnut periarfissinneqarput, matumani Nakuusa meeqqanut ilaasortanut isumassarsiorfissatut qaaqquneqarpoq . Inuusuttut kommunalbestyrelsiannut pilersaarut imartooq soorunami ullup qeqqartitsinissamut ataatsimoornissamullu inissaqartitsivoq, taamaalillutik ilaasortat, suliassat tulliuttut suliarilinnginnerini imminerminnut qallinerusinnaassammata. Matumani workshoppi, meeqqat inuusuttullu akornanni pinerlunnermut ukkatarinnittoq eqqaaneqarsinnaavoq.
Februaarip ulluisa 16-ianni tallimanngornermi inuusuttut kommunalbestyrelsiat naggammik ataatsimiippoq. Tassani ilaatigut sunngiffimmi pitsaasumik inuuneqartoqarnissaa pillugu naggataamik innersuusiortoqarpoq. Taamatuttaaq ulloq taanna ilaasortat innersuussutitik kommunalbestyrelsimut tunniuppaat, taakkulu inuusuttut siunnersuutaannik suliaqarneq ingerlateqqissavaat.
Ataani inuusuttut kommunalbestyrelsiannit innersuussutit atuarsinnaavatit:
