Inissianik suliniut nutaaq Naalakkersuisut Angerlarsimaffeqanngitsunut Periusissiaanniit angerlarsimaffeqanngitsut nutaanik najugaqarfittaartinnissaannut piareerpoq. Angerlarsimaffeqanngitsut 15-it misileraataasumik suliniummut, Kommuneqarfik Sermersuup aamma Naalakkersuisut akornanni suleqatigiiffiusumut, isertissapput. Misileraataasumik suliniut Kalaallit Nunaanni Housing First (Angerlarsimaffik Salliutillugu) aallaavigalugu misileraataavoq siullerpaaq, kommuninilu allani suliniutinut assingusunut ilisimasanik misilittakkanillu naleqarluartunik katersuiffiussalluni.
Kommuneqarfik Sermersuup aamma Naalakkersuisut suleqatigiillutik inissianik suliniutaannut nutaamut ulloq 29. februar 2024 najugaqartut siulliit isertissapput. Inissianik suliniummi innuttaasut eqimattat angerlarsimaffeqanngitsut najugaqalissapput. Misileraanermik aaqqissuussineq tassaavoq Naalakkersuisut Angerlarsimaffeqanngitsunut Periusissiaannut ilaasoq angerlarsimaffeqannginneq isumaginninnikkullu annertuumik atugarliorneq pillugit sulinermi nutaamik sammiviliinermik siunertaqartoq. Suliniut Housing Firstimik aallaaveqarpoq, innuttaasup eqqissisimanartumiinnissaanik aalaakkaasumiinnissaanillu pilersitsinissaq siunertaalluni, piffissami sivisunerusumi aalaakkaasumik najugaqarfigisinnaasaat.
”Innuttaasut angerlarsimaffeqanngitsut ikiorniarlugit aalaakkaasumik angerlarsimaffik aallaaviusariaqarpoq. Suliniummik matumannga angerlarsimaffik aallaaviuvoq, ataavartumik angerlarsimaffimmut nuunneq attassisinnaanerlu qulakkeerniarlugu pisariaqartoq angerlarsimaffeqanngitsut inuttut sammisatigullu tapersersorneqarsinaanissaannut. Angerlarsimaffeqannginneq pillugu akiuiniarnermut tamanna ataqatigiissitsineq suliniutaavoq pingaaruteqartoq.” taama Isumaginninnermut, Ilaqutariinnut, Suliffeqarnermut Nunamullu Namminermut Naalakkersuisoq, Jess Svane, oqaaseqarpoq nangillunilu:
”Naalakkersuisut anguniagarivaat, isumaginninnikkut ajornartorsiutit, soorlu angerlarsimaffeqannginneq pillugit nutaamik allaanerusumillu sulinissarput. Ukioq kingulleq angerlarsimaffeqanngitsunik kisitsinerup takutippaatigut angerlarsimaffeqanngitsut 591-iusut. Amerlavallaarujussuarput. Ajoraluartumik innuttaasut atugarliortut qanoq annertutigisumik ikiorneqarnissamik tapersersorneqarnissamillu pisariaqartitsinerat pillugu paasinninnissap amigaataanerata aamma tamanna inernerivaa. Naalakkersuisut assut nuannaarutigaat inissianik misileraaneq nutaaq Kommuneqarfik Sermersooq peqatigalugu aallarnisarneqarsinnaammat. Pingaaruteqarpoq angerlarsimaffeqannginneq pillugu nuna tamakkerlugu najukkamilu suleqatigiinnissarput. Naalakkersuisut neriupput suliniuteqarneq amerlasuunik misilittagaqarfiulluassasoq, suliniuteqarnerit assingusut kommunini allani aallarnisarneqarniassammata” Isumaginninnermut, Ilaqutariinnut, Suliffeqarnermut Nunamullu Namminermut Naalakkersuisoq, Jess Svane, naggasiilluni oqaaseqarpoq.
Suliniut tassaavoq Kommuneqarfik Sermersuup aamma Naalakkersuisut akornanni suleqatigiinneq nutaaq.
”Angerlarsimaffeqannginneq ajornartorsiutaavoq Kommuneqarfik Sermersuup Nuummi isumaginninnermik suliaqarnerani annertuumik imaqartoq. Angerlarsimaffeqanngitsunut unnuisarfeqarpugut kiisalu angerlarsimaffeqanngitsunut sulisartunut katitertakkanik inissiaqarluni, kisianni inissianik amigaateqarneq annertoqaaq. Tassunga pissutaaqataapput innuttaasut sinerissamiit Nuummut tikittut Nuummi inissaqarnissamik pilersaaruteqaratik nuttarnerat. Taamaattumik angerlarsimaffeqannginneq ajornartorsiutaavoq annertooq ilungersunartorlu. Ajornartorsiulli kisimiilluta aaqqiivigisinnaanngilarput, taamaattumillu nuannerpoq ajornartorsiutip ilaa pillugu Naalakkersuisullu inissiat misileraataasut pillugit suleqatigiissinnaagatta. Kommunimi suliniuterpassuarnut pitsaasunut inissiat nutaat tapertaalluarput pitsaasut, nuannaarutigaaralu innuttaasut ikiortariallit amerlanerusut toqqissimaffiusumik kialaartumillu “angerlarsimaffittut” taasinnaasaminnik najugaqalissammata, ” borgmester Avaaraq Olsen oqaaseqarpoq.
Housing First tassaavoq angerlarsimaffeqannginneq pillugu tamakkiisumik isiginninnermik aallaaveqarneq, innuttaasoq nalinginnaasumik inissiaqarfimmi inissiamik nammineq najugassaanik neqeroorfigineqarluni peqatigalugu immikkut aaqqissuunneqartumik najugaqarnermini tapersersorneqassalluni. Taamaattumik misileraanermut siunertaavoq innuttaasoq aalajaatsumik eqqissisimanartumillu najugaqarnissaa, isumaginninnikkut tapersersuinermik neqeroorfigineqarluni, najugaqarnissamik sungiusarnermi aamma aningaasaqarnikkut isumalluutaat pillugit isumaginninnissamut ikiorneqarluni. Najugassatigut inissisimaneq aalaakkaasoq piumasaqaataavoq soorlu tarnikkut nappaateqarnerup, atornerluinerup aamma inunnik attaveqaateqarnerup aalaakkaasunngornerinut pitsanngoriarnerinullu.
Attaveqarfissaq
Annertunerusumik paasisaqarniaruit attaveqarfigissinnaasat: e-mailikkut: hspd@nanoq.gl oqarasuaatikkulluunniit + 299 34 56 11