2024-mi februaarip ulluisa aallaqqaataani Kommuneqarfik Sermersuup Inunnut innarluutilinnut tunngasunik sulianik ataqatigiissaarisut atuutilersippai, immikkoortoq nutaaq innuttaasut timikkut tarnikkulluunniit piginnaasakillisimasut taakkulu ilaqutaasa amerlanerusut erngertumik pisariaqartitaannik eqquutsitsinissamik siunertaqarluni ilusilersorneqarsimasoq.
Immikkoortortamik ammaanissaq 2022-mi novembarip ulluisa 29-anni kommunalbestyrelsimit aalajangerneqarpoq, kommunip sullissinerani ‘ataasiinnarmik saaffissaqarnissamik tunngaveqarneq’-mik atuutilersitsineq ilutigalugu.
Inunnut innarluutilinnut tunngasunik sulianik ataqatigiissaarisut periusissiami matumani pingaarutilimmik inissisimapput, siunertaavorlu innuttaasut sullissinerit pitsaanerusut ataqatigiinnerusullu misigissagaat piginnaasakillisimanerminnullu atatillugu kommunimi ingerlatsivinni assigiinngitsuni tapersersorneqarnikkut pissarsiarisinnaasatik pillugit ataqatigiissaarinikkut siunnersuinikkullu tapersersorneqarumallutik saaffiginnissinnaassasut.
Suliffeqarnermut Isumaginninnermullu Ataatsimiititami siulittaasup, Inge Olsvig Brandtip, immikkoortortaqarfimmik nutaamik ammaanissaq qilanaarisimavaa: ”Politikkikkut allaffissornikkullu suliassaqarfinni, innarluutilinnut tarnimikkullu nappaatilinnut tunngassutilinni ingerlaavartumik pitsanngorsaanissaq, sivitsortumik kissaatigisimavarput. Taamaattumik tamanna ‘ataasiinnarmik saaffissaqarnissamik tunngaveqarneq’-mik atuutilersitsinermik kommunip suliaqarnerani aallartiffissatut piukkunnaateqarluarsimavoq. Pisariaqartitsineq taamatut ersaritsigisumik takusinnaagaangatsigu ilutigalugulu iliuuseqarsinnaanermut periarfissaqaraangatta nuannersuujuaannarpoq”
Immikkoortortaqarfimmik taamaattumik pisariaqartitsineq ersarippoq, innuttaasummi amerlasuut kommunimi aaqqissuussaanermi peqataaniarnermikkut pisariaqartitamikkullu ikiorsiissutissarsiornermikkut ajornartorsiuteqarsimammata. Inunnut innarluutilinnut tunngasunik sulianik ataqatigiissaarisut, innuttaasunut pisinnaatitaaffimmikkut imaluunniit kommunimi pisariaqartitamikkut nalornissuteqartunut siunnersuinikkut, ilitsersuinikkut tapersersuinikkullu ajornartorsiutinik tamakkuninnga iliuuseqarfiginnissapput. Ataqatigiissaarisut aamma tapersersuinissamik periarfissat attuumassutillit kommunimi immikkoortortat ingerlatsiviillu assigiinngitsut akornanni ingerlanneqartarnissaat tapersiivigissavaa, taamaalinikkullu ingerlatsinerit unittoornissaat pinaveersaartillugu.
Nielsine Grønvold Petersen Inunnut innarluutilinnut tunngasunik sulianik ataqatigiissaarisuni suleqatigiinni aqutsisuuvoq, taassumalu innuttaasut suliassaqarfimmi ikiorserneqarnissaminnik pisariaqartitsisut tamarmik immikkoortortaqarfimmik nutaamik atuisuulissasut neriuutigaa: ”Siunnersuinikkut ilitsersuinikkullu ikiuunnissatsinnut piareersimavugut illillu ikiornissannut aamma piareersimavugut. Timikkut imaluunniit tarnikkut piginnaasakillisimaguit, imaluunniit piginnaasakillisimasumik qanigisaqaruit, attaviginninnissat tunuarsimaarutigissanngilaat. Saaffiginnittarfitsinnut takkullutit saaffiginnissinnaavutit, sianerfigaluta mailimilluunniit nassiussillutit. Qanorluunnit ikkaluarpat ikiuunnissatsinnut piareersimavugut.”
Innuttaasut Suliffeqarnermut Isumaginninnermullu Ingerlatsivimmi saaffiginnittarfimmi Imaneq 34-mi illumi tungujortumi takkullutik saaffiginnissinnaapput.
Paasissutissat ikiorserneqarnissarluunniit pillugit innuttaasut saaffiginninniarunik ataqatigiissaarisunut attaveqarsinnaapput oqarasuaatikkut normu 36 66 66 atorlugu imaluunniit KHE@sermersooq.gl-imut mailerlutik.
