Kommuneqarfik Sermersooq marlunngornermi januaarip ulluisa 16-ani 2024, suliami innuttaasut marluk, 2010-mi oktobarimi Nuummi Eqqartuussivimmi Danmarkimi inunnut annertuumik innarluuteqartunut angerlarsimaffimmiittussanngortillugit eqqartuunneqarsimasut pillugit akiliisussaatitaanermut tunngasumi taperserneqarpoq.
Innuttaasut pineqartut marluullutik 2011-mi Danmarkimi angerlarsimaffimmut inissinneqarput. Horsensimi Eqqartuussivimmi 2014-imi eqqartuussisoqarnerani innuttaasut marluk inunnut annertuumik innarluutilinnut angerlarsimaffimmiittussanngorlugit eqqartuunneqarput. Peqatigitillugu pineqaatissiissutigineqartut Nuummi Eqqartuussivimmi aalajangerneqartut atorunnaarsinneqarput. Taamanikkut innuttaasup aappaa illoqarfimmi eqqartuussiviup Lolland Kommunemi angerlarsimaffimmut inissinneqarnissaa pineqaatissiissuteqarfigisaani, innuttaasullu aappaata Randers Kommunemi angerlarsimaffimmiittussanngortitaaffigisaani.
Højesteretimit oqaatigineqarpoq, inatsisitigut innarlitsaalineqarneq pillugu inatsit Kalaallit Nunaanni atuutinngitsoq. Taamaattumik inatsisitigut tunngavissaqanngilaq, Kommuneqarfik Sermersooq innuttaasut marluk inissinneqarnerinut akiliisussanngortinneqarsinnaasoq. Qallunaat eqqartuussissutaanni innuttaasut marluk inissinneqarnerat Nuummi Eqqartuussiviup eqqartuussissutaanik tunngaveqarunnaarpoq, taamaattumillu tamatuma kingornatigut Kommuneqarfik Sermersuup innuttaasut marluk inissinneqarnerinut akiliisussanngortinnissaanut tunngavissaarulluni.
Højesteretimit naqissuserneqarpoq, kommune, innuttaasut najugaqarfiat – qallunaat nunaanni eqqartuussaaffigisaat, tassaassasoq Kalaallit Nunaanni eqqartuussaaffianik atorunnaarsitsiffiusoq – aningaasartuutinik akiliisussaasoq. Matumani Lolland Kommune aamma Randers Kommune, tassaapput innuttaasut sinnerlugit akiliuteqartussanngortitaasut.
Qallunaat nunaanni kommunit marluusut piumasaqaatiginikuuaat innuttaasut marluk angerlarsimaffimmiitinnissaannut aningaasartuutit 2014-imi eqqartuussaanerup kingornatigut aamma piffissap sinnerani, angerlarsimaffimmiittussanngortitaaffiat ilanngullugu aningaasartuutigineqartut akilerneqassasut, taamaattoqarpat aningaasat millionit marlunnik kisitsisillit amerlaqqataat akiliutigeqquneqarlutik. Højesteretip erseqqilluinnartumik naqissuserpaa, Kommuneqarfik Sermersuup taamatut piumasaqarfigineqarnissaa tunngavissaqanngitsoq.
Kommuneqarfik Sermersuumut borgmesteri Avaaraq Olsen, oqarpoq: “Aalajangiineq naammagisimaarparput, tassani takutinneqarmat, inatsisip qanoq paasineqarnissaa pillugu uagut paasinninnerput eqqortuusoq. Kommunitut aningaasartuutissat, inatsisitigut tunngavissaqartut kisiisa akilersinnaavagut. Taamaattumik suliamut tassunga tunngatillugu qisuariaateqarpugut.”