Kommuneqarfik Sermersuumi Borgmesteri Avaaraq Olsen, Meeqqanut, Ilaqutariinnut Atuarfeqarnermullu Ataatsimiititamut siulittaasoq Poul Petersen aamma Meeqqanut Ilaqutariinnullu Ingerlatsivimmi pisortaq Frederik Lundblad januaarip ulluisa aqqarnanni Nuuk Outdoorimut suliniuteqarluni inissiisarneq pillugu Inatsisartut Ilaqutariinnermut Peqqissutsimullu Ataatsimiititalianiit ataatsimeeqatiginissaanut aggersarneqarput.
“Massakkut inissisimaneq apeqqutaatinnagu meerartatta inuusuttattalu atugarliornerpaat pitsaanerpaamik sullinneqarnissaat kissaatigaarput. Taamaattumik Ilaqutariinnermut Peqqissutsimullu Ataatsimiititaliap naapinnissamut noqqaassuteqarnera ilassilluarparput. Namminersorlutik Oqartussat kommunillu ataatsimoorlutik meerartatsinnut inuusuttatsinnullu atugarliortunut aaqqiissutissanik pitsaanerpaanik nassaarniarneranni suliaqarnissaq pisariaqartipparput. Suliniuteqarluni inissiinerit unammilligassatut nutaajunngillat, tamannalu Kommuneqarfik Sermersuumi taamaallaat ajornartorsiutaanngilaq” Borgmesteri Avaaraq Olsen oqarpoq.
Ataatsimiinnermi Kommuneqarfik Sermersuumit massakkut inatsisit suliassaqarfimmi kommunimi suliassat ilaannut unammilligassaqartitsisut, tassunga ilanngullugu iliuusissatut piumasaqaatit assigiinngitsut inissiinissanut kinguaattoortitsikulasartut aamma ataatsimiititaliamut tikkuarneqarput. Ataatsimiititaliaq Sermersuumit kissaatigineqartut misissussallugit neriorsuivoq.
Borgmesterip pisortaq peqatigalugu Nuuk Outdoorimut suliniuteqarluni inissiisarnerit ataatsimiititaliamut saqqummiuppai: 2023-mi upernaakkut Kommuneqarfik Sermersuup meeqqat 17-it allatut periarfissaqanngimmat Nuuk Outdoorimut inissippai. Aasap ingerlanerani nakkutilliilluni pulaarnermi pissutsit naatsorsuutigisanut naapertuutinngitsut takuneqarpoq. Taamaattumik kommune Isumaginninnermut Aqutsisoqarfik suleqatigalugu aggustimi meeqqanut inissinneqarnikunut inissanik nutaanik ujaasilerput.
Ullumikkut inuusuttut arfineq marluk, taakkunanilu 18-ileereersut marluk Nuuk Outdoorimiipput. Meeqqat marluusut paaqqinnittarfimmut nutaamut innersuunneqareernikuupput, piaarnerpaamillu nuunnissaat naatsorsuutigineqarpoq. Meeqqat tamarmik, Kommuneqarfik Sermersuup Nuuk Outdoorimut inississimasai massakkut Nuummiipput.
Kommuneqarfik Sermersuup nalunaarutai Ataatsimiititaliamit tusaatissatut tiguneqarput.