Nuummi katersortarfimmi ulloq 11. februaari nal. 13:00 – 15:00 matut ammassapput, tassanilu kommune imminut toqunnissamut pinaveersaartitsineq pillugu oqalugiaateqartitsissaaq. Kalaallisut ingerlanneqassaaq, toqqaannartumilli oqalutseqarnissamut periarfissaqassaaq.
Kommuneqarfik Sermersooq imminut toqunnissamut pinaveersaartitsisarneq pillugu oqalugiarnissamut aggersaavoq, tassanilu Innuttaasut Peqqissusiannik Ilisimatusarfimmit (Center for Folkesundhed i Grønland) ilisimatooq Arnârak Patricia Bloch pissanganarluinnartumik oqalugiaateqassaaq. Arnârak Kalaallit Nunaanni imminut toquttarneq pillugu pinaveersaartitsisarnermik ilisimatusarpoq, 2023-milu ilisimatusartunut nersornaammik Nordentoftprisen tunineqarluni. Tamatuma saniatigut ICC-mi Peqqinnissamut Ataatsimiititaliarsuarmi aqutsisooqatigiinni siulittaasuuvoq, saniatigut Alaskami Canadamilu Inuit akornanni imminut toquttarneq pillugu pinaveersaartitsisarnermik suliaqarnermi misilittakkani iluatsilluartut pillugit ilisimasaminik avitseqateqassaaq.
Oqalugiaammi Arnâqqap imminut toquttarnissamik pissusilersortarnermut illersuutaasinnaasut pillugit ilisimatusarfigisimasai qitiutinneqassapput, tassungalu ilanngullugu Kalaallit Nunaanni ukiuni kingullerni tallimani imminut toquttarneq pillugu pinaveersaartitsinermi suut ingerlalluarsimanersut oqaluttuarilaassavai. Tamatuma kingorna paasisimasallit sassartinneqarlutik oqallittoqassaaq, qulequtarlu tassaassaaq: “Sianissutsikkut peqqissuuninnut suut iluaqutaasimappat?”
Imminut toquttarneq pillugu pinaveersaartitsinermut tunngasunik innuttaasut ilisimasaqalernissaat aamma Kalaallit Nunaanni imminut toquttarneq pillugu pinaveersaartitsinermut inuttut, ilaqutariittut, atorfilittullu qanoq iliuuseqarsinnaanerput pillugu paasisaqarnissaq oqalugiaammi siunertaavoq.
Imminut toquttarnissamik pissusilersortarnermut illersuutaasinnaasut pillugit Arnâqqap ilisimatusarfigisimasai kingulliit atuakkit uani: