Ataasinngorneq januaarip 22-ani 2024 Kommuneqarfik Sermersuumi kommunalbestyrelse aalisarneq pillugu inatsisissaq pillugu immikkut sammisaqarpoq. Tassunga atatillugu aalisarnermik ingerlatallit arlallit, taakkununnga ilaallutik Aalisarnermut Piniarnermullu Naalakkersuisoqarfimmi sulisut aammalu maani aalisarnermik ingerlataqartut kattuffii isummanik saqqummiussinissaannut isummersornissaannullu aggersarneqarput.
“Aalisarnermik ingerlataqartut taamak amerlatigisut ataatsimoortinnerisigut aalisarneq pillugu inatsisissamut tunngasunik isummanik assigiinngitsunik paasisaqarnissaq pingaaruteqarpoq,” Kommuneqarfik Sermersuumi borgmesteri, Avaaraq Olsen oqarpoq.
Immikkut sammisaqarneq aallarnerlugu Aalisarnermut Piniarnermullu Naalakkersuisoqarfimmi sulisut aalisarneq pillugu inatsisissaq pillugu nassuiaateqarput. Tamanna pereermat kommunimi sinerissap qanittumi aalisartut aalisarnermik ingerlatsisut kattuffiineersut oqaaseqartinneqarput. Aggersarneqarsimasut tassaapput:
- Ittoqqortoormiini Piniartut Peqatigiiffiat (IPP), siulittaasoq Åge Danielsen,
- Qeqertarsuatsiaani Aalisartut Piniartullu Peqatigiiffiat (QAPP), siulittaasoq Ole Henriksen,
- Tasiilami Aalisartut Piniartullu Peqatigiiffiat (TAPP), Bendt Josvassen,
- Paamiuni Aalisartut Piniartullu Peqatigiiffiat (PAPP), siulittaasoq Niels Lorentzen,
- Nuummi Aalisartut Piniartullu Peqatigiiffiat (NAPP), siulittaasoq Niels Boassen,
- Neqitaq, siulittaasoq Karl Kristian Kruse,
- Qalerualinniat Aalisagarniallu Kattuffiat (QAK), siulittaasoq Henrik Sandgreen.
Ilisarititsisoqareermat politikkikkut oqallittoqarpoq, tassanilu inatsisissatut siunnersuut eqqartorneqarpoq.
Ataatsimut isigalugu aalisarnermut inatsisissatut siunnersuummi aningaasalersueriaasissatut periarfissat aalisartunit ernumassutigineqarput, inatsisissallu suliarineqarnerani naammattumik peqataatinneqarsimanngitsutut misigisimallutik.
Borgmesterip uppernarsarpaa, immikkut sammisaqarnermit paasisat aalisarneq pillugu inatsisissamut tusarniaanermi pisortatigoortumik akissuteqaasiornissamut atorneqassasut. “Kommunalbestyrelsip aalajangiusimavaa qulakkeerneqassasoq, aalisartortatta tusaaniarneqarnissaat, aammalu taakkua soqutigisaat inaarutaasumik inatsimmi ilanngunneqarnissaat” Avaaraq Olsen oqarpoq.
