Kommuneqarfik Sermersuumi suliffeqarfiit 2023-mi piffissami januaarimit novemberimut katillugit 233,3 millioner koruunit umiarsuarnut takornariartaatinut toqqaannartumik akiligassiissutigaat. Pisiniarfiit neriniartarfiillu takornariartaatini ilaasunit kaaviiaartitaat 5,6 millioner koruuniupput, agguaqatigiissillugu pisiniarfimmut ataatsimut 934.000 koruunit. Tamanna Sustine Consultip nalunaarusiaani Sermersooq Business sinnerlugu suliarisimasaanni atuarneqarsinnaavoq.
Nalunaarusiami tunngavigineqarput paasissutissat suliffeqarfinnit 23-nit katersorneqarsimasut. Akissuteqartut umiarsuarnut takornariartaatinut tunngasuni nunani allani umiarsuaatilinnut, umiarsuarnut pilersuinermilu akiligassanngortitsinermut tunngasunik kisitsisinik nassiussipput. Ataatsimut isigalugit paasissutissiissutigaat, Kommuneqarfik Sermersuumi nunani allamiut suliffeqarfiutaannut umiarsuarnut takornariartaatinut attuumassuteqartunut akiligassanngortinneqarsimasut 233 mio.-inik annertussuseqartut. Taamaalilluni nunanit allaniit kalaallit niuerfiutaannut 233 mio.-inik akiliisoqarsimavoq. Kaaviiaartinneqartut 233 mio.-it affaasa missaat Polaroil-imeersuupput.”
“Umiarsuit takornariartaatit tikittarnerannit aningaasatigut iluanaarutit pillugit paasissutissanik tigussaasunik kiisami peqalernerput nuannaarutigisorujussuuarput. Siunissami takornarialerinermik pilersaarusiornissamut qaammaasaqarnerulluta paasissutissanillu tutsuiginartunik tunngavissaqarluta pilersaarusiorsinnaalerpugut,” Mads-Daniel Skifte, Sermersooq Businessimi pisortaq oqarpoq.
Umiarsuit takornariartaatit suliffissaqartitsivimmi suliffeqarfiit apersorneqartut kaaviiaartitaasa 32%-it missaraat, tamassuma erseqqissisillugu najukkami aningaasaqarnermut pingaaruteqassusiat. Nioqqutissat takornarianit pisiarissallugit soqutigineqarnerpaat 40 koruunit 6000 koruunillu akornanni akii nikerarput, agguaqatigiissillugit 1078 koruuninik naleqarlutik.
Suliffeqarfiit misissuinermut peqataasimasut 2023-mi 4,85 millioner koruuninik aningaasaliissuteqarsimapput aamma 2024-mi takornariartitsineq aallartitsinnagu 5,8 millioner koruuninik aningaasaliissuteqassallutik pilersaaruteqarput, kiisalu 2025 takornariartitsineq aallartitsinnagu 6,1 millioner koruuninik aningaasaliissuteqassapput kissaatigineqartunik amerliartortunik naaperiaaniarlutik.
Suliffissaqartitsineq eqqarsaatigalugu umiarsuit takornariartaatit ulloq naallugu suliffinnik 29-nik pilersitsisimapput, ullup ilaani suliffinnik 27-nik aamma ukiup ilaani suliffissanik 155-inik pilersitsisimallutik. Piginnaassutsit kissaatigineqarnerpaat tassaapput suliffimmut aalajaatsumik takkuttarnerit, oqaatsitigut piginnaasaqarneq pingaartumik tuluttoorsinnaaneq aamma ammasuuneq kiisalu kiffartuussinissamik periuseqarneq.