Nuup Saava ukiormanna Nuuk Snow Festimut aaqqissuussiffigineqaqqissaaq, sisamanngornermiit 29. februaari sapaammut 3. marsimut ingerlanneqartussamik. Iligiit 15-it nuannisaqatigiinnissaq pinerullugu unammissapput, ukiormanna pinngortitaq sammisatut tunngavigissallugu.
“Februaarip naalernerani uteqqikkutta festivalimi kiinnanik nutaanik ilisarnartunillu takunissarput neriuutigaarput. Kikkulluunniit unamminissamut nalunaarnissaminnut tikilluaqqusaapput sammisamut attuumassutilinnik piviusorsiortunik piviusorsiunngitsunillu apummik ilusilersuisoqassaaq,” Nuuk Snow Festimi suliniummut aqutsisoq Alberte Parnuuna oqarpoq.
“Ukioq kingulleq kiarujussuarnerata unitsinngilaatigut naak ajornakusoortitsigaluartoq, nerioqaagulli ukiormanna festivalimi aputeqarluassasoq silaannarlu allanngorassanngitsoq” oqarpoq.
Ataatsimoortunut peqataarusukkaanni ilusilersueqataarusunngikkaannilu festivalimi kajumissutsimik suliaqartussatut nalunaartoqarsinnaavoq. Festivali sioqqullugu, ingerlanneqarnerani kingornatigullu ikiuisussanik pisariaqartitsisoqarpoq, namminerlu aalajangiisoqarsinnaavoq nalunaaquttap akunneri qassit suleqataassanerluni.
“Nuuk Snow Fest illoqarfimmi innuttaasunut tamanut pikialaarfiuvoq, uagullu aaqqissuisutut festivali ingerlanneqalerpat illoqarfimmi tamarmit peqataasoqarnissaa kissaatigaarput. Illoqarfimmi suliaqartunik suleqateqarnissarput ammaffigaarput illoqarfimmilu suliffeqarfiit peqatigiiffiillu suleqatigiissinnaanissaq pillugu saaffiginnissasut kaammattuutigaarput.” Nuuk Snow Fest-imi suliniummi aqutsisoq nassuiaavoq.
Nunat Avannarlernit inuusuttut
Nuuk Snow Fest suleqatigiinnissamut ataatsimoornermut aamma atassuteqaqatigiinnermut tunngavoq. Peqatigiiffiup NORDEN i Grønland-p kissaatigaa Nunat Avannarlernit inuusuttut tamarmik akunnerminni festivali naapittarfigilissagaat. Peqatigiiffiup NORDEN-p peqatigiiffeqatai suleqatigalugit inuusuttunik marlunnik nunani tamaneersunik qaaqqusisoqarpoq; Island, Færøerne, Åland, Norge, Sverige, Danmark, Finland, tassani aamma inuusuttut Nuummeersut.
PISSUSIVIUSUT:
- Inuit sisamakkaarlutik ilusilersuisarsinnaapput, tunngaviatigullu iligiit piumasaq malillugu angissusilerneqarsinnaallutik. Peqataaniaraanni apummik ilusilersuinermik misilittagaqarnissaq pisariaqanngilaq, nalunaarnerlu akeqanngilaq.
- Attaveqarfissanut paasissutissat festivalip nittartagaani nanineqarsinnaapput, www.snow.gl.
- Kajumissutsimik suliaqartussanut nalunaarnissamut immersugassaq uani nanineqarsinnaavoq: https://forms.gle/FMXkmhxZE4v3YZ5X7
- Ukioq kingulleq ajugaasut, Team Norden, ilusilersukkaminnik “Qaqqat Naalagaat”-nik ilusilersuisut siullermeerlutik peqataapput Takuniaasimasut toqqagaannik ajugaassuteqarput tulliatullu ajugaallutik Balkkan, ilusilersugaralugu “Nappaasilat 2084”, festivalimi takukulaneqartoq.