Allaffimmi atorfeqalernissaq Ernimut, Saqqami piniartukkormiuusumut inornartutut takorluugaasimavoq, sapiillunili Majoriaq aqqutigalugu takorluukkani piviusunngortippaa.
Erni Samuelsen 40-nik ukioqartoq Majoriami aallartikkami ukiuni 25-ni atuarfimmi atuartutut issiasimanngilaq. Nunaqarfimmi Saqqami aalisartukkormiutut piniartukkormiutullu peroriartorsimavoq, meeraanermi annerpaartaani ataatani umiatsiamik aalisaraangat peqatigisarsimallugu. Aamma piffissami atuarfissaraluamini. Ilaatigut piniakkat atuakkanik ilinniartitsissutinik taarsernissaat ajornakusoortaraluartoq maanna Erni Greenland Business School-imi allaffimmiutut TNI-mi ilinniartuuvoq.
Januaarip qaammataani Erni Samuelsen aalajangerpoq ilinniarfiusinnaasut pillugit nittarsaassineq Nuummi Illorsuaq Timersortarfimmi (Godthåbhallen) ingerlanneqartoq alakkarumallugu. Taannalu aalajangernera ilinniagaqalernissaanut aallarniutaavoq. Ilinniarfiusinnaasut assigiinngitsut takutinneqartut naasarlugit misissuataarpai. Ernip meeraallunili allaffimmi sulisarnissani eqqarsaatigisarsimavaa, aamma inuusuttuaraalluni piumassuseqarluarluni ataatami aqqutaa atuallakkaluaramiuk taamatut.
Ilinniarusutatulli takorluukkani aallartissaguniuk, meeqqat atuarfianniit soraarummeernermut allagartaqartariaqarpoq.
”Meeqqat atuarfiani 8 klassimi tiimit atuarfissaraluakka ornissaarlugit aalisariarlungaluunniit piniariartalerpunga, taamaattumik atuarnera naammassinngisaannarpara. Taamaattumik ilinniarfiusinnaasunik nittarsaassisoqarmat Majoriap -nerrivianut saaffiginnippunga paasiniarlugu qanoq periarfissaqarnersunga. Aamma naluuippara ilumut ilinniagaqarlunga aallartissinnaanerlunga”, Erni Samuelsen oqarpoq.
Majoriami sulisup atuagarsornikkut (FA) Majoriami qaffassaanissaanik ilitsersuuppaa.
Ilinniarfiusinnaasunik nittarsaassineq Ernimut ornissallugu alloriarnerujussuuvoq, ullumikkut inissisimaffimmi tungaanut alloriarnerisa amerlasuut siullersaat.
Erni meeraasorli siunertaajuaannarpoq, piniartuullunilu aalisartunngorumaartoq, inuussutissarsiullu taanna nuannarisorujussuusimavaa. Inuussutissarsiummi tassani kiffaanngissuseq inuunerani pingaarnerpaat ilaginikuuaat. Piumalleraangami umiatsiamik avalaannarsinnaaneq, nalunaaqutaq malillugu inuiaqatigiit pilersaarutaat inuillu allat apeqqutaatinnagit aallartarneq.
Salliutillugilli pingaartitat allanngortarput, ilaqutaqalerluni angerlarsimaffimminni ikiuussinnaanera pisariaqalerpoq, piffissami piffissaanngitsumilu aallaqqajunnaartariaarulluni. Marsip qaammataani siallertoq Erni Nuummi Majoriamukarpoq atuagarsornikkut qaffassarnissani qinnuteqaatigiartorlugu.
”Marsip aallaqqaataani ilinniagaqarnissannik qinnuteqaasioriartorama aatsaavissuaq ilinniagaqarnissamut qinnuteqaateqarpunga. Uppernarsaatit eqqaasinnaasakka tamaasa nassarpakka, paasinarsivorli kuisinnermut allagartara puigorsimagiga, taava uterlunga arpaannaq aapallappara siallertoq”, Erni Samuelsen oqaluttuarpoq.
Ernip Majoriami aallartinnera oqitsuinnaanngikkaluartoq, naammassivaa soraarummeernermullu allagartaqalerpoq. Maanna Erni Greenland Business Schoolimi TNI-mi allaffimmiunngorniarluni ilinniagaqaleruttorpoq.
”Ilaanni ajornalaartaraluarpoq, ingerlalluarporli. Majoriamiinnera iluaqutigisimaqaara, ilikkagassatigut inuttullu”, Erni Samuelsen oqarpoq.
Kingorna Erni nammineerluni Nuummi Majoriaq saaffigivaa, maannakkut ilinniartuusut oqaloqatigisinnaanerlugit paasiniaalluni. Kajumissaarusulluinnarpaami.
”Majoriami aallarteqqaarama paatsiveqanngilluinnarpunga. Atuartitsineq malinnaaffigisinnaanngingajappara, soorluli suna tamarmi isumaqanngitsoq. Ilinniartitsisut ilai kamaattarpakka, eqqarsartarlungalu atuartitseriaasiat pitsaanngitsoq. Periarfissaq tamanna atorluarsiuk. Malinnaalluaritsi. Nammineerlusi iliuuseqaritsi, sunaluunniit nammineq pineq ajorpoq. Ilungersuutigigaanni iluatsissaqqaarpoq.”
Siunnersorneqarnissamik pisariaqartitsiguit, najukkanni Majoriaq attaveqarfiginissaanut tikilluaqqusaavutit. Najukkani Majoriaq attaveqaatai uani nanikkit.
