Kulturitta siuarsarneqarnissaa pillugu Siunnersuisooqatigiit Aningaasaateqarfik Sermeq aqqutigalugu aningaasanik agguaavoq. Qinnuteqartut amerlanerpaat akuersissutigineqarput.
Kommunimi kulturi assut pingaartinneqarpoq, maannakkullu Aningaasaateqarfik Sermermit tapiissutit agguaanneqarnerisa kingorna pitsaanerusumik atugassaqartitseqqilerpoq. Kulturitta siuarsarneqarnissaa pillugu Siunnersuisooqatigiit kulturimut tapiissutinut qinnuteqaatit katillugit 15-it tiguai, tamatumalu uppernarsarpaa kommunimi nutaaliornernut kulturikkullu suliniutinik amerlaqisunik uummaarissaatinik suliaqartoqartoq. Qinnuteqartut amerlanerpaat aningaasatigut tapiiffigineqarnissartik qilanaarisinnaavaat, taakkulu kulturikkut suliniutinut assigiinngitsunut tapiissutaaqataassapput.
Kulturikkut suliniuterpassuit ilaat, aningaaqarnikkut tapiiffigineqarnissamik naatsorsuuteqarsinnaasut, tassaapput nipilersukkanik saqqummiussassanik immiussineq, filmiliorneq, isiginnaartitsinerit aamma eqqumiitsulianik saqqummersitsinerit. Kingullermik Aningaasaateqarfik Sermermit agguaassinermi katillugit 1,2 mio. koruunit sinnerlugit, qinnuteqartunut tamangajannut agguaallugit, tapiissutigineqarput. Kultureqarnermut Immikkoortortami ulluinnarni kommunimi innuttaasunut tamanut kulturimut tunngasunik assigiinngitsunik neqerooruteqarnissaa qulakkeerniarlugu sulissutigineqartarpoq. Jonas Lundsgaard Nilsson, kommunimi kultureqarnermut immikkoortortami aqutsisoq, tassunga atatillugu oqaaseqarpoq:
”Aningaasaateqarfik Sermeq TAMANUT kulturimut tunngasunik suliniutinik, kommunimi innuttaasut nuannaarutissaannik, piviusunngortitsinissamut qinnuteqarnissamut periarfissiisuuvoq. Suliniutit kommunimi inoqarfinnik assigiinngitsunik ataatsimoortitsisinnaasut immikkut pingaartinneqarput.”
Nangippoq: ”Kingullermi qinnuteqartitsinermi qinnuteqartut amerlanerpaat tapiiffigineqarput, tamatumalu uppernarsarpaa innuttaasut soqutiginarluinnartunik isumassarsiaqartartut suliniuteqarlutillu, suliniutinut kommunimi kulturip uummaarissuunissaanut tapersersuisussat pitsanngorsaataasussallu.
Suliniutissamut isumassarsiaqaruit, aningaasatigut tapiiffigineqarnissallu kissaatigalugu, kommunip nittartagaani nutaarsiassat Facebook-ikkullu qupperneq malinnaaffigisariaqarpat, tassani ataavartumik Aningaasaateqarfik Sermermut qaqugu tulliani qinnuteqartoqarsinnaanersut paasissutissanik saqqummiussisoqartassaaq. Tamanna pillugu annertunerusumik atuarsinnaavutit uani.