Meeqqat suli suliffeqarfimmiitinneqartut pillugit ulluni kingullerni KNR-imi sammineqarnerisa kingorna pineqartut pillugit apeqqusersuisoqarpoq. Meeqqat arfineq-marluk pineqarput. Taakku tamarmik Nuummiipput, aalajangersimasumik akuttoqatigiimmik nakkutilliisuniit alakkarneqartarlutik. Meeqqanut arfineq-marluusunut pilersaaruteqartoqarpoq, taakkulu tamarmik qaammatini aggersuni allamut inissinneqarumaarlutik, Kommuneqarfik Sermersuumi Meeqqanut Ilaqutariinnullu Ingerlatsivimmi pisortaq Frederik Lundblad oqarpoq.
KNR-ip saqqummiussinerani allattoqarpoq, aatsaat qaammatit arfinillit qaangiutereerpata, meeqqat tamarmik Nuuk Outdoorimiit nuunneqarsimalissasut. Tamanna eqqortuunngilaq.