Nuuk eqqaanilu innuttaasunut juullerpalaarneq annertuseqqissaaq Ukkusissaq decembarip 18-ianiit 24-anut juullimut qaammaqqusersorneqarpat.
Juullimut qaammaqqusersuineq kusanarluinnartoq piviusunngorpoq kommunimit Naleraq Lights aamma Qulutius Events suleqatiginerisigut, taakku assingusunik assiliartaliillutik qaammaqqusersuinermik misilittagaqarluartuupput – Tassunga ilanngullugu suliniummi “Luminous Greenland”, Ukkusissami aamma qaammaqqusersuinikuummata. Ilaatigut ilutsinik takussutissianillu, tamarmik juullimut tunngasunik juullimut qaammaqqusersuisoqassaaq. Qaammaqqutit pingaartumik Qinngutsinni ersarinnerussapput, soorunamili illoqarfimmi sumiiffippassuarni aamma takuneqarsinnaassapput.
Tassunga tunngatillugu Kommuneqarfik Sermersuumi Kultureqarnermut Immikkoortortami aqutsisoq Jonas Lundsgaard Nilsson oqaatigaa:
“Decembarip qaammataa ukiup ingerlanerani taartarpoq, Kommuneqarfik Sermersuumilu qaamanerulaarnissaanut iliuuseqarusussimavugut. Taamaattumik qaammaqqutit inuttaasunut tamanut juullerpalaarnermik, aliannaarnermik kissalaarnermillu tunisinissaat neriuutigaarput”
Ukkusissaq kisimi juullimut qaammaqqusersorneqassanngilaq. Nuummi Sipisaq Kangillermi qaammaqqutit nalinginnaasumik qalipaatai aamma juullip qalipaaterpassuarnik taarserneqassapput. Ukkusissami qaammaqqutit ingerlaarneranni Sipisaq Kangillermilu juullimi qalipaatit qaammaqqutaaneranni ullup tamaasa eqqaasinneqartassaagut juulli qanillilivissoq.