Nuummi illoqarfiup qeqqani sanaartornermi piffissaq pingaaruteqarluinnartoq nalliussineqarpoq ulluunerani paaqqinnittarfik Naasut atoqqaartinneqarmat.
Inissiarsuup Blok P inissisimaffigisimasaani ulluunerani paaqqinnittarfik ”Naasut” novembarip 24-anni siullermeerluni matuni ammarpai. Paaqqinnittarfimmik atoqqaartitsineq kommunimit, angajoqqaanit aammalu meeqqanit nalliuttorsiutigineqarpoq.Ulloq atoqqaartitsiffiusumi pingaarnerit ilagaat paaqqinnittarfiup aqqa avammut suaarutigineqarmat, ”Naasut”.
“Naasut isumaga malillugu tulluarnerusinnaanngilaq. Eqqatsinni naasut eqqarsaatigilaarsigit – ataasiakkaannguit tamarmik immikkut immikkuullarissuteqarlutillu immikkut kusanassuseqarput. Taamatut meerartavut isigisarpavut. Immikkut tamarmik immikkuullarissuupput, periarfissarpassuaqarlutik pinnissuseqarlutillu, namminiussutsiminnik”, Meeqqanut, Ilaqutariinnut Atuarfeqarnermullu Ataatsimiititami siulittaasoq Poul Petersen taama oqarpoq.Marie Natuk Nielsen atsiinissamut unammisitsinermi ajugaasoq atoqqaartitsinermi peqataavoq nersorniarneqarlunilu.
Avatangiisit toqqissisimaffiusut
Nalliuttorsiornermi borgmesterip tullersortaa Justus Hansen, Meeqqanut, Ilaqutariinnut Atuarfeqarnermullu Ataatsimiititami aamma Illoqarfimmik Ineriartortitsinermut Sanaartornermullu Ataatsimiititami ilaasortat, sulisut, angajoqqaat kiisalu meeqqat qaaqquneqarsimapput. Poul Petersen angajoqqaanut ilaatigut ima oqaaseqarpoq.“Angajoqqaanut oqarusuppunga, meeqqassi toqqissisimanartumi asaneqarlutik ornissinnaasaat qanoq pingaaruteqartigisoq nalunngilarput. Naasut tassaassaaq meeqqassi asanninnermik, isumassorneqarnermik toqqissisimanartumilu ineriartorfigisinnaasaat”.
Ulluunerani neqeroorummi aqutsisoq Katrine Larsen Lennert paaqinnittarfimmi sulinissani nuannaarutigaa, illu meeqqanut qanilaassusermik toqqissisimaffiusumillu sinaakkusiisussaammat.Katrine oqalugiareermat borgmesteri Avaaraq Olsen sinnerlugu Poul Petersenimit tunissummik tunineqarpoq. Tunissutaapput qilaatit sisamat qilaasiortartumit Nuummersumit sananeqarsimasut, qilaatit inersimasunit meeqqaniillu atorneqarsinnaasut.
Persuarsiornermi aamma nipilersortoqarpoq sulisullu kusassaatinik suliaqarsimariaramik persuarsiorpalaartumik kissalaartumik peqataasunut pilersitsisoqarsimalluni.Ullunerani paaqqinnittarfik tulliani atuarfik
Ulluunerani paaqqinnittarfik “Naasut” atoqqaarfissiorneqarpoq, atuarfik Inussuk naammassinissaanut ukiup affaa sioqqullugu, atuarfik pilersaarutit malillugit aggustimi 2024-mi ammartussaavoq.
Paaqqinnittarfik aaqqissugaanera Tunngaviit arfineq marluk malillugit sananeqarsimavoq, taakku Meeqqanut Atuarfeqarnermullu Ingerlatsiviup 2021-imi pilersissimavai. Tunngaviit arfineq marluk pillugit uani paasisaqarnersinnaavutit.Poul Petersenip aamma qutsavigai illussanik titartaasartut KHR, sanaartortut Istak, sanaartornermut siunnersortit Torp Development kiisalu kommunimi sulisut, sanaartornermi piviusunngortitsinissamut sulilluarsimanerannut aammalu tunniusimalluarsimanerannut.
