Frederik Lundblad Kommuneqarfik Sermersuumi Meeqqanut Ilaqutariinnullu Ingerlatsivimmi pisortatut atorfinippoq. Atorfinitsitsinissamut ataatsimiititaq aalajangiisoq isumaqatigiissuteqarpoq, piaarnerpaamillu atorfinissaaq.
Frederik Lundbladip Kommuneqarfik Sermersooq iluaniit nalunngilaa, ukiut kingulliit qulingiluat kommunimi Sunngiffeqarnermut immikkoortortami Fagchefitut sulinikuugami. 2003-mit 2014-imut politiini assigiinngitsunik atuuffeqarsimavoq, matumani Nunatsinni Politiinngorniarfimmi aqutsisutut aamma Nunatsinni Politimesterip ataani Atuarfeqarnermut Ilinniarfeqarnermullu immikkoortortami ilinniartitaanermut aqutsisutut sulisimalluni.
Aqutseriaasia akuersaartutut suliakkersuisartutullu nassuiarneqarsinnaavoq. Periutsinik sakkussanillu atuinermik pitsanngorsaanermik kiisalu nalunaarusioriaatsinik angusassanillu eqquutsitseriaatsinik ineriartortitsinermik misilittagaqarpoq.
Kommunaldirektøri Ole Jakobsen pisortaqatigiinni Frederik Lundbladip suleqatigilernissaa qilanaaralugu oqaaseqaateqarpoq. “Pisortaq suliassaqarfimmik pingaarutilerujussuarmik meeqqanik ilaqutariinnillu qitiutitsiffiusumik kivitseqataassaaq,” Ole Jakobsen oqarpoq.
“Siusinnerusukkut politiini atorfeqarninni inooqataanermi ajornartorsiutit kingunerisinnaasaat takukulasarsimavakka. Taamaattumik ajornartorsiutinik taakkuninnga aaqqeeqataasinnaanissara qilanaaraara,” Frederik Lundblad oqarpoq.
Frederik Lundblad ujakkaartartut peqatigiiffianni NSP-mi peqataalluartuuvoq taamatullu aamma sunngiffimmi pinialunnermik nuannarisaqartuulluni. Marie nuliaraa, marluullutillu marlunnik meeraqarput, Niviaq aamma Salik.
Frederik Lundblad arlalinnik ilinniagaqarlunilu pikkorissartarnikuuvoq, matumani Aarhusimi Erhvervsakademimi Aqutsinermi ilinniagaqarluni massakkullu Business Institute Danmarkimi MBA-mik ingerlatsileruttorluni.