Marlunngorneq novembarip ulluisa arfineq-aappaanni Atuarfik Hans Lyngemi atuarfiup siulersuisunut ilassutissatut qinersisoqarpoq, kommunimili atuarfiup siulersuisui qanoq atuuffeqarpat?
Ukiumi kommunalbestyrelsimut qinersiviusumi kommunimi meeqqat atuarfiini siulersuisussanik qinersineq ingerlanneqartarportaaq. Atuarfiup siulersuisui kikkut tamat oqartussaaqataanerat tunngavigalugu atuarfinni tamani qinigaasarput, siunertaallunilu atuarfinni ataasiakkaani ingerlatsinermut najoqqutassaliornissaq aamma atuarfimmik ineriartortitsinissamut suleqatigiinnissaq. Atuarfinni ataasiakkaani siulersuisut atuartunut angajoqqaat aamma atuartut ilinniartitsisullu sinnerlugit toqqarneqarsimasunik ilaasortaqartarput.
Allatut oqaatigalugu atuarfiup siulersuisuisa atuarfimmik nakkutilliineq pingaarnertut suliassaraat, tassa assersuutigalugu akuersissutigisassavaat:
- Atuarfimmi malittarisassat
- Atuartitsinermut atuarfiup pilersaarutai
- Atuarfiup missingersuutai
- Atuarfimmi atuartitsinermut atortussat
Tamatuma saniatigut atuarfiup siulersuisui atuarfimmi pisortamut atuarfimmik ingerlatsinermut tunngasunik pissutsinik assigiinngitsunik paasissutissanik piumasaqarsinnaapput.
Atuarfik Hans Lyngemi atuarfiup siulersuisuini ilaasortat marluinnanngorsimammata ilassutissatut qinersisoqarpoq. Maanna Atuarfik Hans Lyngemi atuarfiup siulersuisuini ilaasortat tassaapput:
Angajoqqaat sinniisui
- Britta Nielsen
- Nick Johansen
- Klaus Møller
- Petrine Jungersen
- Kirsten Fencker
Ilinniartitsisut sinniisui:
- Birthe Kleist
- Angutimmarik Fleischer
Atuartut sinniisaat
- Alex Petersen
Sinniisussaq:
- Erena Kristensen
Atuarfinni siulersuisut pillugit uani paasissutissanik annertunerusunik atuarsinnaavutit