Siusinnerusumut sanilliullugu Paamiut takornariartaassuarnit tikinneqarnerusalerpoq tamannalu Paamiormiunut periarfissarpassuaqartitsilerpoq. Ornittagaq Nuilaaq periarfissamik atorluaalluni takornarianik tikilluaqqusisarnissamik neqerooruteqarpoq, ornittakkamilu atuisut takornariartitsisorineqarlutik.
Aasap ukiariartulerneratalu ingerlanerani takornariartaassuit 24-t Paamiunut tikipput ataatsimut 20 tusindit sinnerlugit amerlassusilinnik ilaasoqartut. Nalinginnaasuunngilaq taamatut amerlatigisut tikittarnerat takornariartaassuillu Paamiuni innuttaasunut nutaanik periarfissaqartitsilernerat.
Inunnut innarluutilinnut ornittagaq Nuilaaq periarfissamik atorluaavoq. Tupilak Travel suleqatigalugu takornariat misigisassarsiortinneqarput, Paamiuniinnerisa nalaani Nuilaaq pulaartinneqartarpoq, atuisullu suliarisartakkaminnik assigiinngitsunik saqqummersitsillutillu tuniniaasarput.
”Nuilaami sulissutigiuarparput ornittagaq atuisuilu najukkami innuttaasunut ikiuuttarnissaat. Taamaattumik pissusissamisoorsimavoq takornarianik sullissisut ikiornissaat, tamanna aamma innuttaasorpassuarnut tunniussisarmat. Uagutsinnuinnaanngitsoq iluaqutaavoq, najukkami innuttaasunut tamanut aamma iluaqutaavoq, akisussaaqataavugummi najukkami innuttaasut ineriartortinneqarnissaannut”, Andrine Jensen, Nuilaamik aqutsisoq, oqaluttuarpoq.
Nuilaami atuisut takornariartitsisartutut
Nuilaami atuisut marluk, Søren ”Suulut” Petersen aamma Thomas ”Nuka” Lorentzen, innarluuteqarput, takornariaqartitsisartutullu periarfissaq nuannaarlutik atorluarsimavaat. Naak Søren “Suulut” timimigut ajornartorsiuteqaraluarluni, innaallagissamoortumik kørestoleqarami, sulinissaminut piumassuseqarpoq tikeraallu kulturiniit assigiinngitsorpassuarneersut peqatigisinnaavai. Takornariartitsisutut aatsaavissuaq misiliilluni sulivoq.
”Aallaqqaammut tunuarsimaaraluarpunga, takornariartitsisartutut qanoq sulissallunga nalugakku aamma ilumut taamatut sulisinnaanerlunga. Kisianni Andrine Jensenip aperimmanga takornariartut Nuilaami pulaarpata pulaartitsisuusinnaasunga naggataatigut akuersivunga. Taassuma kingornatigut takornariartut isumaginissaannut imminut tatigilerpunga illoqarfimmullu angalaarullugit”, Søren ”Suulut” Petersen oqarpoq.
Thomas ”Nuka” Lorentzen aamma takornariartaassuarneersunik angallassisarpoq. Tamannalu ”Nuka”-mut takornartaanngilaq. “Paamiunut tikeraartut soqutigiuaannarpakka, inuillu assigiinngitsunik tunuliaqutallit naapinnissai nuannariuarpara. Illoqarfitsinnut tikeraartut peqatiginissaannut isumassarsitittarpaannga” Thomas ”Nuka” Lorentzen oqarpoq.
Takornariartitsisartutut sulineq “Suulut”-mut “Nuka”-mullu inuttut misigisaqarfiuvortaaq. ”Takornariartitsigaangama inuttut pisuunnguallaatigiuarpara. Sulinerugaluartoq takornariartut attaveqarfigineqarsinnaapput. Assersuutigalugu arlallit suli attaveqarfigisarpakka taakku assinik nassittaraminnga”, Thomas ”Nuka” Lorentzen oqarpoq.
”Suulut”-mut aasaq manna misigisaqarnarnerusimavoq. ”Nuannerpoq inuuneq allanngulaarsinnaallugu. Inuppassuit nutaat naapippakka takornariartitsisutullu sulininni tuluttoorsinnaanera eqqaaqqippara taamaattumillu illoqarfipput pillugu oqaluttuarisaaneq illoqarfippullu kusanartoq ilisimasaqarfiginerulerpara tamakkuninngami takornariartut oqaluttuuttarakkit” Søren ”Suulut” Petersen oqaluttuarpoq.
”Suulut” aamma ”Nuka” aasaqqinnissaanut takornariartitsisutut sulinissartik qilanaarilereerlugu oqaluttuarput.
Tupilak Travel ilisimatitsivoq Paamiuni takornariartitsisartut 30-t attuumassuteqartut, aasaanerani takornariartitsisarnermut attuumassuteqartut.
