Ulloq 13. septembari Illersornissaqarfiup illuutinut aqutsisoqarfia (Forsvarets Ejendomsstyrelse) Arsummi innuttaasunik ataatsimiititsinermut aggersaavoq, tassani Illersornissaqarfiup Kangilinnguani avatangiisimik saliinissaanut pilersaarut saqqummiunneqarpoq.
Ataatsimiinnermi nunap mingutsinneqarsimasup qanorpiaq salinneqarnissaanik pilersaarutit saqqummiunneqarput, saliinissallu 2038-p tungaanut pinissaa naatsorsuutigineqarpoq. Ataatsimiigiartorpassuusimapput, aamma Kommuneqarfik Sermersooq sinniisuutitaqartoq saliinissamut atatillugu paasiniaalluni apeqquteqartarpoq. Ataatsimiinnermi peqataasut ilaannit kissaatigineqarpoq kommunip, Illersornissaqarfiup nunaqartullu qanimut suleqatigiinnissaat.
2017-imi juunimi taamanikkut Naalakkersuisut siulittaasuat Illersornissamullu ministeri Claus Hjort Frederiksen isumaqatigiissuteqarput Kangilinnguit Grønnedalimik aamma taaneqartartup salinneqarnissaa pillugu. Kommuneqarfik Sermersooq aamma Illersornissaqarfiup illuutinut aqutsisoqarfia (Ejendomsstyrelse) siusinnerusukkut sumiiffimmi illuutinik piiaanissamik isumaqatigiissuteqarput.
“Siusinnerusukkut Illersornissaqarfiup illuutinut aqutsisoqarfia sumiiffimmi illuutinik piiaanissamik isumaqatigiissuteqarfigivarput. Taamanikkut isumaqatigiissuteqartoqarpoq pinngortitaq eqqarsaatigalugu, nunataata pissusissamisoortumik atugassaqartinneqarnissaa pillugu,” Sanarfinermut Avatangiisinullu ingerlatsivimmi Fagchefi, Margrethe Rosing Hegelund oqaluttuarpoq.
Nangilluni oqarpoq: “Taamaattumik pissusissamisoortumik immikkoortup atugassaqartinnissaa soqutigisarivarput, uumasut naasullu ingerlalluaatiginiassammassuk. Tamanna tunngavigalugu Illersornissaqarfiup massakkut nunap mingutsinneqarsimasup qanorpiaq salinneqarnissaanik pilersaarutinik saqqummiussinera pitsaasuuvoq.”
